girya-o-zari ka saman uTha lete hain

girya-o-zārī kā sāmān uThā lete haiñ

hijr meñ 'mīr' kā dīvān uThā lete haiñ

koī lailā bhī nahīñ apnī kahānī meñ magar

sar pe ham dasht-o-bayābān uThā lete haiñ

ham ko talvār se raġhbat to nahīñ hai sā.īñ

haañ magar ho ke pareshān uThā lete haiñ

aise tājir ki jinheñ suud gavārā ho faqat

rāh-e-ulfat meñ vo nuqsān uThā lete haiñ

maiñ muḳhātib huuñ kisī aur munāfiq se miyāñ

aap kyoñ haath meñ qur.ān uThā lete haiñ

be-jhijhak aap mohabbat ko jatāyā kiije

ham hasīnoñ ke to ehsān uThā lete haiñ

girya-o-zari ka saman uTha lete hain

hijr mein 'mir' ka diwan uTha lete hain

koi laila bhi nahin apni kahani mein magar

sar pe hum dasht-o-bayaban uTha lete hain

hum ko talwar se raghbat to nahin hai sain

han magar ho ke pareshan uTha lete hain

aise tajir ki jinhen sud gawara ho faqat

rah-e-ulfat mein wo nuqsan uTha lete hain

main muKHatib hun kisi aur munafiq se miyan

aap kyon hath mein quran uTha lete hain

be-jhijhak aap mohabbat ko jataya kije

hum hasinon ke to ehsan uTha lete hain