girya-zari bhi karun shor machaun main bhi

girya-zārī bhī karūñ shor machā.ūñ maiñ bhī

hālat hāl-e-parindoñ ko sunā.ūñ maiñ bhī

zindagī roz nayā ruup dikhātī hai mujhe

arsa-e-jism kabhī chhoḌ ke jā.ūñ maiñ bhī

hazrat-e-qais agar aap ijāzat de deñ

kabhī vahshat ke liye dasht meñ aa.uuñ maiñ bhī

saare māhaul ko de duuñ kisī tābīr kā vajd

apnī mastī meñ koī ḳhvāb sunā.ūñ maiñ bhī

maiñ koī ishq karūñ haar ke jiitā huā ishq

yaanī ushshāq meñ kuchh naam kamā.ūñ maiñ bhī

aaj tanhā.ī ke manzar ne sujhāyā hai 'sa.īd'

mausam-e-hijr kī tasvīr banā.ūñ maiñ bhī

girya-zari bhi karun shor machaun main bhi

haalat haal-e-parindon ko sunaun main bhi

zindagi roz naya rup dikhati hai mujhe

arsa-e-jism kabhi chhoD ke jaun main bhi

hazrat-e-qais agar aap ijazat de den

kabhi wahshat ke liye dasht mein aaun main bhi

sare mahaul ko de dun kisi tabir ka wajd

apni masti mein koi KHwab sunaun main bhi

main koi ishq karun haar ke jita hua ishq

yani ushshaq mein kuchh nam kamaun main bhi

aaj tanhai ke manzar ne sujhaya hai 'said'

mausam-e-hijr ki taswir banaun main bhi