go ab mere wujud pe sar hai na dosh hai

go ab mire vujūd pe sar hai na dosh hai

phir bhī vahī junūñ vahī josh-o-ḳharosh hai

tujh sā koī nahīñ hai vagarna jahān meñ

koī zahīn hai to koī saḳht-kosh hai

tū ne rakhā na halqa-e-ahbāb meñ jise

vo shaḳhs aaj bhī tirā halqa-ba-gosh hai

ran meñ hameñ rajaz kī zarūrat nahīñ ki ab

itnā badan meñ ḳhuun nahīñ jitnā josh hai

idrāk se fuzūñ hai mirī hālat-e-junūñ

tū jāntā nahīñ ki tujhe 'aql-o-hosh hai

insān ke mizāj meñ yaksāniyat nahīñ

maiñ kaise maan jā.ūñ ki banda sarosh hai

itnā ġhurūr qasr-e-shahī par na kījiye

yaañ koī mustaqil nahīñ ḳhāna-ba-dosh hai

bas maiñ hī chup nahīñ huuñ sar-e-bostān-e-'ishq

bulbul bhī gul ke saath barābar ḳhamosh hai

ye kaun paḌh rahā hai marāsī aniis ke

har samt marhabā kī sadā zeb-e-gosh hai

vo aañkh aañkh hai ki jo rakhtī hai mā'rifat

vo gosh gosh hai jo haqīqat-niyosh hai

maiñ jo huā huuñ qarya-ba-qarya zalīl-o-ḳhvār

is meñ bhī tere tarz-e-taġhāful kā dosh hai

vā'iz burā na kah mirī bazm-e-nashāt ko

yaañ par tirī bahisht se kam nāv-nosh hai

itnī shafaq-numā hai ruḳh-e-yār kī phaban

jitnī charāġh-e-shām kī lau surḳh-posh hai

go ab mere wujud pe sar hai na dosh hai

phir bhi wahi junun wahi josh-o-KHarosh hai

tujh sa koi nahin hai wagarna jahan mein

koi zahin hai to koi saKHt-kosh hai

tu ne rakha na halqa-e-ahbab mein jise

wo shaKHs aaj bhi tera halqa-ba-gosh hai

ran mein hamein rajaz ki zarurat nahin ki ab

itna badan mein KHun nahin jitna josh hai

idrak se fuzun hai meri haalat-e-junun

tu jaanta nahin ki tujhe 'aql-o-hosh hai

insan ke mizaj mein yaksaniyat nahin

main kaise man jaun ki banda sarosh hai

itna ghurur qasr-e-shahi par na kijiye

yan koi mustaqil nahin KHana-ba-dosh hai

bas main hi chup nahin hun sar-e-bostan-e-'ishq

bulbul bhi gul ke sath barabar KHamosh hai

ye kaun paDh raha hai marasi anis ke

har samt marhaba ki sada zeb-e-gosh hai

wo aankh aankh hai ki jo rakhti hai ma'rifat

wo gosh gosh hai jo haqiqat-niyosh hai

main jo hua hun qarya-ba-qarya zalil-o-KHwar

is mein bhi tere tarz-e-taghaful ka dosh hai

wa'iz bura na kah meri bazm-e-nashat ko

yan par teri bahisht se kam naw-nosh hai

itni shafaq-numa hai ruKH-e-yar ki phaban

jitni charagh-e-sham ki lau surKH-posh hai