go ba-zahir to mehrban hain aap

go ba-zāhir to mehrbāñ haiñ aap

jāntā huuñ ki bad-gumāñ haiñ aap

intizām-e-chaman nahīñ hotā

kyā kahūñ kaise bāġhbāñ haiñ aap

ma.anī-e-pāsbāñ nahīñ ma.alūm

kaun maane ki pāsbāñ haiñ aap

kārvāñ har qadam pe luTtā hai

vāqa.ī mīr-e-kārvāñ haiñ aap

is meñ gunjā.ish-e-kalām nahīñ

kishvar-e-dil ke hukmrāñ haiñ aap

apnī hastī pe naaz hai mujh ko

merī hastī ke rāz-dāñ haiñ aap

aap se mujh ko rabt-e-mohkam hai

zarra maiñ mehr-e-zau-fishāñ haiñ aap

hazrat-e-abr-ahsani ke tufail

kahāñ 'aḳhtar' the ab kahāñ haiñ aap

go ba-zahir to mehrban hain aap

jaanta hun ki bad-guman hain aap

intizam-e-chaman nahin hota

kya kahun kaise baghban hain aap

mani-e-pasban nahin malum

kaun mane ki pasban hain aap

karwan har qadam pe luTta hai

waqai mir-e-karwan hain aap

is mein gunjaish-e-kalam nahin

kishwar-e-dil ke hukmran hain aap

apni hasti pe naz hai mujh ko

meri hasti ke raaz-dan hain aap

aap se mujh ko rabt-e-mohkam hai

zarra main mehr-e-zau-fishan hain aap

hazrat-e-abr-ahsani ke tufail

kahan 'aKHtar' the ab kahan hain aap