go dil ke dukh dilon mein chhupae hue hain log

go dil ke dukh diloñ meñ chhupā.e hue haiñ log

apnā janāza aap uThā.e hue haiñ log

kis taur se deñ aur ko hamdardī-o-ḳhulūs

ḳhud aap zindagī ke satā.e hue haiñ log

aa.egā ab na koī masīhā najāt kā

bekār hī umiid lagā.e hue haiñ log

tā aane vaalī nasl añdheroñ meñ kho na jaa.e

ḳhuuñ ke charāġh aaj jalā.e hue haiñ log

mahrūmī-e-nasīb kā kis se gila kareñ

jis ke fareb saikḌoñ khaa.e hue haiñ log

aa.e nazar jahāñ na koī pesh koī pas

ye ḳhud ko kis maqām pe laa.e hue haiñ log

har samt terī baat sunī jā.egī 'nadīm'

har chand tujh ko aaj bhulā.e hue haiñ log

go dil ke dukh dilon mein chhupae hue hain log

apna janaza aap uThae hue hain log

kis taur se den aur ko hamdardi-o-KHulus

KHud aap zindagi ke satae hue hain log

aaega ab na koi masiha najat ka

bekar hi umid lagae hue hain log

ta aane wali nasl andheron mein kho na jae

KHun ke charagh aaj jalae hue hain log

mahrumi-e-nasib ka kis se gila karen

jis ke fareb saikDon khae hue hain log

aae nazar jahan na koi pesh koi pas

ye KHud ko kis maqam pe lae hue hain log

har samt teri baat suni jaegi 'nadim'

har chand tujh ko aaj bhulae hue hain log