go dur ho chuka hun yaran-e-anjuman se

go duur ho chukā huuñ yārān-e-anjuman se

lekin mafar nahīñ hai ehsās kī chubhan se

husn-e-nazar kā jaadū sar chaḌh ke boltā hai

asnām-e-marmarīñ bhī lagte haiñ sīm-tan se

ġhuncha hī phuul ban kar jān-e-chaman huā hai

maiñ ne yaqīñ kī daulat paa.ī hai husn-e-zan se

aaj un ke rāstoñ meñ kāñTe bichhe hue haiñ

kal tak jo khelte the rañgīnī-e-chaman se

jaise chaman se nik.hat jaise sadaf se motī

aise judā huā huuñ maiñ jannat-e-vatan se

maiñ rāz-e-rañg-o-bū se nā-āshnā nahīñ huuñ

mujh ko gila bhī kab hai phūloñ kī anjuman se

merī ġhazal 'urūj' ik tasvīr-e-asr-e-nau hai

maiñ ne use sañvārā tahzīb-e-fikr-o-fan se

go dur ho chuka hun yaran-e-anjuman se

lekin mafar nahin hai ehsas ki chubhan se

husn-e-nazar ka jadu sar chaDh ke bolta hai

asnam-e-marmarin bhi lagte hain sim-tan se

ghuncha hi phul ban kar jaan-e-chaman hua hai

main ne yaqin ki daulat pai hai husn-e-zan se

aaj un ke raston mein kanTe bichhe hue hain

kal tak jo khelte the rangini-e-chaman se

jaise chaman se nikhat jaise sadaf se moti

aise juda hua hun main jannat-e-watan se

main raaz-e-rang-o-bu se na-ashna nahin hun

mujh ko gila bhi kab hai phulon ki anjuman se

meri ghazal 'uruj' ek taswir-e-asr-e-nau hai

main ne use sanwara tahzib-e-fikr-o-fan se