go nazar nazar bikhre pattharon ke chehre hain

go nazar nazar bikhre pattharoñ ke chehre haiñ

vādiyoñ ke hāthoñ meñ rāstoñ ke chehre haiñ

kaisā be-yaqīñ paikar mujh meñ aa ke utrā hai

sab uḌe uḌe us kī ḳhushbuoñ ke chehre haiñ

ḳhvāhisheñ to kirneñ haiñ jal bujhīñ to jaañ de deñ

mere dil kī muTThī meñ jugnuoñ ke chehre haiñ

maiñ ki 'aks se le kar aañkh tak akelī huuñ

ā.inoñ meñ phir kaisī mahfiloñ ke chehre haiñ

baat kī samā'at kā e’tibār kaise ho

dostoñ ke lahjoñ meñ tohmatoñ ke chehre haiñ

chhoTī chhoTī bātoñ meñ chhoTe chhoTe rishtoñ meñ

kis qadar qayāmat kī uljhanoñ ke chehre haiñ

dil ke dasht kā manzar aur kaḌe safar kī dhuup

har qadam 'humairā' ab hiddatoñ ke chehre haiñ

go nazar nazar bikhre pattharon ke chehre hain

wadiyon ke hathon mein raston ke chehre hain

kaisa be-yaqin paikar mujh mein aa ke utra hai

sab uDe uDe us ki KHushbuon ke chehre hain

KHwahishen to kirnen hain jal bujhin to jaan de den

mere dil ki muTThi mein jugnuon ke chehre hain

main ki 'aks se le kar aankh tak akeli hun

aainon mein phir kaisi mahfilon ke chehre hain

baat ki sama'at ka e’tibar kaise ho

doston ke lahjon mein tohmaton ke chehre hain

chhoTi chhoTi baaton mein chhoTe chhoTe rishton mein

kis qadar qayamat ki uljhanon ke chehre hain

dil ke dasht ka manzar aur kaDe safar ki dhup

har qadam 'humaira' ab hiddaton ke chehre hain