go shama hun pa mahfil-e-jaanan se dur hun

go sham.a huuñ pa mahfil-e-jānāñ se duur huuñ

maiñ andalīb huuñ pa gulistāñ se duur huuñ

barg-e-ḳhizāñ-rasīda banāyā hai ishq ne

maiñ mausam-e-bahār meñ bustāñ se duur huuñ

ai yaar justujū meñ tirī sūrat-e-ġhubār

sar-gashta huuñ pa gardish-e-daurāñ se duur huuñ

parvāna-vār go ki jalāyā hai ishq ne

lekin charāġh-e-gor-e-ġharībāñ se duur huuñ

ghultā hai dil ki rah-rav-e-ulfat ke vāste

maiñ ḳhizr huuñ pa chashma-e-haivāñ se duur huuñ

kahtā hai ye pukār ke ḳhūn-e-shahīd-e-nāz

qātil maiñ tere gosha-e-dāmāñ se duur huuñ

banda huuñ ishq kā mirā maz.hab na pūchhiye

āzād ho ke gabrū musalmāñ se duur huuñ

mauj-e-nashīm-e-sub.h satātī hai kyā mujhe

maiñ bū-e-gul kī tarah gulistāñ se duur huuñ

kahtā hai us kī zulf meñ phañs kar ye murġh-e-dil

qaidī to huuñ 'jamīla' pa zindāñ se duur huuñ

go shama hun pa mahfil-e-jaanan se dur hun

main andalib hun pa gulistan se dur hun

barg-e-KHizan-rasida banaya hai ishq ne

main mausam-e-bahaar mein bustan se dur hun

ai yar justuju mein teri surat-e-ghubar

sar-gashta hun pa gardish-e-dauran se dur hun

parwana-war go ki jalaya hai ishq ne

lekin charagh-e-gor-e-ghariban se dur hun

ghulta hai dil ki rah-raw-e-ulfat ke waste

main KHizr hun pa chashma-e-haiwan se dur hun

kahta hai ye pukar ke KHun-e-shahid-e-naz

qatil main tere gosha-e-daman se dur hun

banda hun ishq ka mera mazhab na puchhiye

aazad ho ke gabru musalman se dur hun

mauj-e-nashim-e-subh satati hai kya mujhe

main bu-e-gul ki tarah gulistan se dur hun

kahta hai us ki zulf mein phans kar ye murgh-e-dil

qaidi to hun 'jamila' pa zindan se dur hun