go yaum-e-badr marka-e-kar-zar tha

go yaum-e-badr ma.arka-e-kār-zār thā

is shakl meñ vo āyat-e-parvardigār thā

kahte haiñ ek shaḳhs asīrān-e-badr se

rishte meñ ḳhvesh-e-sayyad-e-vālā-tabār thā

vo kaun zauj zainab-e-bint-e-rasūl kā

bulās vo jo sāhib-e-izz-o-vaqār thā

thā hukm-e-ām jo zar-e-fidya ke vāste

dāḳhil har ek is meñ siġhār-o-kibār thā

makke meñ ye ḳhabar jo ga.ī gūñjtī huī

chhūTā adā-e-fidya se jo māl-dār thā

dāmād-e-tājdār-e-madīna asīr-e-ġham

apne adā-e-fidya se be-iḳhtiyār thā

zainab ko dī ḳhabar ye janāb-e-rasūl ne

fidye kā hukm-e-ḳhās magar baar baar thā

jis dam sunā ye hazrat-e-zainab ne mājrā

fidya diyā vo apne gale kā jo haar thā

laayā gayā vo haar huzūr-e-rasūl meñ

dekhā jo us ko aap kā dil be-qarār thā

vo haar kyā thā bāġh-e-mohabbat kā daaġh thā

yā ātish-e-firāq kā taaza sharār thā

vo haar thā ki haar kī sūrat meñ jalva-gar

dāġh-e-ġham-e-ḳhadīja-e-ulfat-shi.ār thā

bhaḌkā.ī us ne ātish-e-furqat dabī huī

ya.anī ġham-e-firāq kī vo yādgār thā

vo aqd ya.anī shān-e-mohabbat kā zinda-dār

āzādī-e-asīr kā bhī chāra-kār thā

'kaifī' yahī vo jur.at-e-iḳhlās ḳhaas thī

jis se ki qasr-e-dīn-e-mubīñ ustuvār thā

go yaum-e-badr marka-e-kar-zar tha

is shakl mein wo aayat-e-parwardigar tha

kahte hain ek shaKHs asiran-e-badr se

rishte mein KHwesh-e-sayyad-e-wala-tabar tha

wo kaun zauj zainab-e-bint-e-rasul ka

bulas wo jo sahib-e-izz-o-waqar tha

tha hukm-e-am jo zar-e-fidya ke waste

daKHil har ek is mein sighaar-o-kibar tha

makke mein ye KHabar jo gai gunjti hui

chhuTa ada-e-fidya se jo mal-dar tha

damad-e-tajdar-e-madina asir-e-gham

apne ada-e-fidya se be-iKHtiyar tha

zainab ko di KHabar ye janab-e-rasul ne

fidye ka hukm-e-KHas magar bar bar tha

jis dam suna ye hazrat-e-zainab ne majra

fidya diya wo apne gale ka jo haar tha

laya gaya wo haar huzur-e-rasul mein

dekha jo us ko aap ka dil be-qarar tha

wo haar kya tha bagh-e-mohabbat ka dagh tha

ya aatish-e-firaq ka taza sharar tha

wo haar tha ki haar ki surat mein jalwa-gar

dagh-e-gham-e-KHadija-e-ulfat-shiar tha

bhaDkai us ne aatish-e-furqat dabi hui

yani gham-e-firaq ki wo yaadgar tha

wo aqd yani shan-e-mohabbat ka zinda-dar

aazadi-e-asir ka bhi chaara-kar tha

'kaifi' yahi wo jurat-e-iKHlas KHas thi

jis se ki qasr-e-din-e-mubin ustuwar tha