go zabanen lakh hon dil ki sada to ek hai

go zabāneñ laakh hoñ dil kī sadā to ek hai

jitne hoñ andāz lekin mudda.ā to ek hai

kuchh mahāzoñ par bahā.eñ kuchh bahā.eñ khet meñ

muḳhtalif jā par sahī ḳhūn-e-vafā to ek hai

har taraf se imtihāñ-gāh-e-vafā meñ jā.ūñgā

qissa-e-dār-o-rasan kā marhala to ek hai

daar ho maqtal ho yā ho tuur kā jalva kahīñ

jazba-e-zauq-e-mohabbat kā sila to ek hai

maiñ samajhtā huuñ ye duniyā hai hasīnoñ se bharī

kyā karūñ zauq-e-nazar kā mudda.ā to ek hai

aah naale dard-o-ġham aḳhtar-shumārī raat kī

ai masīh-e-vaqt in sab kī davā to ek hai

duur hoñ chāra-garān-e-vaqt bas ab duur hoñ

'asr' kī taklīf kā dard-āshnā to ek hai

go zabanen lakh hon dil ki sada to ek hai

jitne hon andaz lekin muddaa to ek hai

kuchh mahazon par bahaen kuchh bahaen khet mein

muKHtalif ja par sahi KHun-e-wafa to ek hai

har taraf se imtihan-gah-e-wafa mein jaunga

qissa-e-dar-o-rasan ka marhala to ek hai

dar ho maqtal ho ya ho tur ka jalwa kahin

jazba-e-zauq-e-mohabbat ka sila to ek hai

main samajhta hun ye duniya hai hasinon se bhari

kya karun zauq-e-nazar ka muddaa to ek hai

aah nale dard-o-gham aKHtar-shumari raat ki

ai masih-e-waqt in sab ki dawa to ek hai

dur hon chaara-garan-e-waqt bas ab dur hon

'asr' ki taklif ka dard-ashna to ek hai