go zamana aql-o-danish se sanwarta jae hai

go zamāna aql-o-dānish se sañvartā jaa.e hai

zehn insāñ kā magar phir bhī bikhartā jaa.e hai

chal usī mahfil meñ chal phir ai dil-e-ḳhāna-ḳharāb

tark-e-rasm-o-rāh kā ehsās martā jaa.e hai

jab se dekhe haiñ chaman meñ āshiyāñ jalte hue

merā dil jashn-e-charāġhāñ se bhī Dartā jaa.e hai

is jahān-e-ġham meñ hotā hai use hāsil sukūñ

apne armānoñ kā jo bhī ḳhuun kartā jaa.e hai

kar rahe haiñ log tasḳhīr-e-mah-o-anjum magar

qā’r-e-'ishrat meñ 'qavī' insāñ utartā jaa.e hai

go zamana aql-o-danish se sanwarta jae hai

zehn insan ka magar phir bhi bikharta jae hai

chal usi mahfil mein chal phir ai dil-e-KHana-KHarab

tark-e-rasm-o-rah ka ehsas marta jae hai

jab se dekhe hain chaman mein aashiyan jalte hue

mera dil jashn-e-charaghan se bhi Darta jae hai

is jahan-e-gham mein hota hai use hasil sukun

apne armanon ka jo bhi KHun karta jae hai

kar rahe hain log tasKHir-e-mah-o-anjum magar

qa’r-e-'ishrat mein 'qawi' insan utarta jae hai