ghubar-e-rah-e-wafa aasman sa lagta hai

ġhubār-e-rāh-e-vafā āsmāñ sā lagtā hai

har ek zarra yahāñ kahkashāñ sā lagtā hai

ye fāsla mujhe jaane kahāñ pe le jaa.e

vo fāsla jo tire darmiyāñ sā lagtā hai

mire baḌoñ kī duāoñ kā ye karishma hai

ki sar pe mujh ko sadā sā.ebāñ sā lagtā hai

na.ī uḌaan ne yuuñ duur kar diyā ghar se

ki āsmāñ mujhe apnā makāñ sā lagtā hai

yaqīn jāniye ham dil-jaloñ kī bātoñ se

kabhī dhuāñ nahīñ uThtā dhuāñ sā lagtā hai

mire makāñ meñ bhī khilte haiñ rang rang ke phuul

mirā makān bhī hindostāñ sā lagtā hai

'sa.īd' mujh ko to ab zindagī kā har lamha

yaqīñ sā hote hue bhī gumāñ sā lagtā hai

ghubar-e-rah-e-wafa aasman sa lagta hai

har ek zarra yahan kahkashan sa lagta hai

ye fasla mujhe jaane kahan pe le jae

wo fasla jo tere darmiyan sa lagta hai

mere baDon ki duaon ka ye karishma hai

ki sar pe mujh ko sada saeban sa lagta hai

nai uDan ne yun dur kar diya ghar se

ki aasman mujhe apna makan sa lagta hai

yaqin jaaniye hum dil-jalon ki baaton se

kabhi dhuan nahin uThta dhuan sa lagta hai

mere makan mein bhi khilte hain rang rang ke phul

mera makan bhi hindostan sa lagta hai

'said' mujh ko to ab zindagi ka har lamha

yaqin sa hote hue bhi guman sa lagta hai