ghubar-e-zulmat-e-dauran mein aT gaya hun main

ġhubār-e-zulmat-e-daurāñ meñ aT gayā huuñ maiñ

vo chāñd huuñ ki jo mehvar se haT gayā huuñ maiñ

mirī nigāh meñ thī tang vus.at-e-kaunain

ab apnī zaat meñ lekin simaT gayā huuñ maiñ

kahāñ talāsh karūñ jā ke ādamiyyat ko

mire karīm qabīloñ meñ baT gayā huuñ maiñ

naved-e-sub.h kā ḳhurshīd hai kahāñ yā-rab

shab-e-hayāt kī zulmat meñ aT gayā huuñ maiñ

kabhī nasīm ke jhoñkoñ se saañs ruktī hai

kabhī sumūm ke tūfāñ meñ DaT gayā huuñ maiñ

qadam qadam pe yahāñ nafratoñ ke jaal bichhe

kabhī kabhī rah-e-manzil se kaT gayā huuñ maiñ

ye kaun mere tasavvur meñ jalva-farmā hai

vufūr-e-shauq meñ kis se lipaT gayā huuñ maiñ

harīm-e-nāz meñ dikhlā.ī be-ruḳhī kis ne

ki ulTe paañv 'majīdī' palaT gayā huuñ maiñ

ghubar-e-zulmat-e-dauran mein aT gaya hun main

wo chand hun ki jo mehwar se haT gaya hun main

meri nigah mein thi tang wusat-e-kaunain

ab apni zat mein lekin simaT gaya hun main

kahan talash karun ja ke aadamiyyat ko

mere karim qabilon mein baT gaya hun main

nawed-e-subh ka KHurshid hai kahan ya-rab

shab-e-hayat ki zulmat mein aT gaya hun main

kabhi nasim ke jhonkon se sans rukti hai

kabhi sumum ke tufan mein DaT gaya hun main

qadam qadam pe yahan nafraton ke jal bichhe

kabhi kabhi rah-e-manzil se kaT gaya hun main

ye kaun mere tasawwur mein jalwa-farma hai

wufur-e-shauq mein kis se lipaT gaya hun main

harim-e-naz mein dikhlai be-ruKHi kis ne

ki ulTe panw 'majidi' palaT gaya hun main