ghubar-o-sang se diwar-o-dar se rishta hai

ġhubār-o-sang se dīvār-o-dar se rishta hai

na jaane kaisā tirī rahguzar se rishta hai

falak se rishta hai shams-o-qamar se rishta hai

hamāre shauq kā ilm-o-hunar se rishta hai

koī jo aa.e to aa.e bhī kyoñ mirī jānib

kisī kā kaun sā sūkhe shajar se rishta hai

maiñ us se milnā bhī chāhūñ agar milūñ kaise

mirā to shaam se us kā sahar se rishta hai

maiñ sūkhne nahīñ detī kabhī do-ābe ko

kisī ke ġham kā mirī chashm-e-tar se rishta hai

maiñ kyā karūñ vahī merī nazar ko hai manzūr

har ik nigāh kā jis kī nazar se rishta hai

duā.eñ māñgtī rahtī huuñ rāt-din 'resham'

maiñ jāntī huuñ duā kā asar se rishta hai

ghubar-o-sang se diwar-o-dar se rishta hai

na jaane kaisa teri rahguzar se rishta hai

falak se rishta hai shams-o-qamar se rishta hai

hamare shauq ka ilm-o-hunar se rishta hai

koi jo aae to aae bhi kyon meri jaanib

kisi ka kaun sa sukhe shajar se rishta hai

main us se milna bhi chahun agar milun kaise

mera to sham se us ka sahar se rishta hai

main sukhne nahin deti kabhi do-abe ko

kisi ke gham ka meri chashm-e-tar se rishta hai

main kya karun wahi meri nazar ko hai manzur

har ek nigah ka jis ki nazar se rishta hai

duaen mangti rahti hun raat-din 'resham'

main jaanti hun dua ka asar se rishta hai