ghubar uDta raha karwan ruka hi nahin

ġhubār uḌtā rahā kārvāñ rukā hī nahīñ

vo kho gayā to mujhe phir kabhī milā hī nahīñ

gavāh haiñ mire ghar ke ye bām-o-dar saare

ki tere ba.ad yahāñ dūsrā rahā hī nahīñ

na koī dar na darīcha na rauzan-o-dīvār

kahāñ se aa.e havā koī rāstā hī nahīñ

hazār rañg bhare laakh ḳhāl-o-ḳhad khīñche

sarāpā terā mukammal kabhī huā hī nahīñ

tamām raat ye āñkheñ talāsh kartī rahīñ

mirā sitāra magar āsmāñ pe thā hī nahīñ

maiñ kyā karūñ ye tirī sabz vādiyāñ le kar

yahāñ vo phuul jise dil kahīñ khilā hī nahīñ

'ziyā' maiñ ḳhud ko ye samjhā rahā huuñ barsoñ se

ki ye jahān tire vāste banā hī nahīñ

ghubar uDta raha karwan ruka hi nahin

wo kho gaya to mujhe phir kabhi mila hi nahin

gawah hain mere ghar ke ye baam-o-dar sare

ki tere baad yahan dusra raha hi nahin

na koi dar na daricha na rauzan-o-diwar

kahan se aae hawa koi rasta hi nahin

hazar rang bhare lakh KHal-o-KHad khinche

sarapa tera mukammal kabhi hua hi nahin

tamam raat ye aankhen talash karti rahin

mera sitara magar aasman pe tha hi nahin

main kya karun ye teri sabz wadiyan le kar

yahan wo phul jise dil kahin khila hi nahin

'ziya' main KHud ko ye samjha raha hun barson se

ki ye jahan tere waste bana hi nahin