gul-ba-daman na koi shoala ba-jaan hai ab ke

gul-ba-dāmāñ na koī sho.ala ba-jāñ hai ab ke

chaar sū vaqt kī rāhoñ meñ dhuāñ hai ab ke

shām-e-hijrāñ jise hāthoñ meñ liye phirtī hai

kaun jaane ki vo tasvīr kahāñ hai ab ke

zindagī raat ke phaile hue sannāTe meñ

duur haTte hue qadmoñ kā nishāñ hai ab ke

terī palkoñ pe koī ḳhvāb laraztā hogā

mere gītoñ meñ koī dard javāñ hai ab ke

ek ik saañs pe dhokā hai kisī aahaT kā

ek ik ghaav ujāloñ kī zabāñ hai ab ke

sahn-e-gulshan hai bahāroñ ke lahū se rañgīñ

shāḳh-e-gul hai ki bas ik teġh-e-ravāñ hai ab ke

jo kabhī husn ke hoñToñ pe na aayā 'jāmī'

haa.e vo harf-e-tasallī bhī garāñ hai ab ke

gul-ba-daman na koi shoala ba-jaan hai ab ke

chaar su waqt ki rahon mein dhuan hai ab ke

sham-e-hijran jise hathon mein liye phirti hai

kaun jaane ki wo taswir kahan hai ab ke

zindagi raat ke phaile hue sannaTe mein

dur haTte hue qadmon ka nishan hai ab ke

teri palkon pe koi KHwab larazta hoga

mere giton mein koi dard jawan hai ab ke

ek ek sans pe dhoka hai kisi aahaT ka

ek ek ghaw ujalon ki zaban hai ab ke

sahn-e-gulshan hai bahaaron ke lahu se rangin

shaKH-e-gul hai ki bas ek tegh-e-rawan hai ab ke

jo kabhi husn ke honTon pe na aaya 'jami'

hae wo harf-e-tasalli bhi garan hai ab ke