gul ban ke mere dil mein sanwar kyon nahin jate

gul ban ke mire dil meñ sañvar kyoñ nahīñ jaate

ab shaam huī jaatī hai ghar kyoñ nahīñ jaate

tum vā'da nibhāne ko bhī tayyār nahīñ ho

Darte ho to vā'doñ se mukar kyoñ nahīñ jaate

ḳhālī haiñ mirī chashm ke sahbā-e-tarannum

ik baar ko aa kar inheñ bhar kyoñ nahīñ jaate

be-vaj.h bhaTakte ho jahāñ-bhar meñ liye dil

ye 'ishq kā rasta hai idhar kyoñ nahīñ jaate

har baar thamā dete ho guldasta unheñ tum

tohfe meñ kabhī le ke jigar kyoñ nahīñ jaate

tum ziist kī ḳhushbū ho ujālā ho chamak ho

jaate hue mujh ko bhī hunar kyoñ nahīñ jaate

ik baar ko jaane se kahāñ hotā hai hāsil

dil-bastī meñ tum bār-e-digar kyoñ nahīñ jaate

maiñ ne bhī kabhī aanā thā shikva hai ye lekin

tum chhoḌ ke kuchh raḳht-e-safar kyoñ nahīñ jaate

jaltī hī chalī jaatī hai ye dard kī ātish

'kāvish' kabhī is dard se bhar kyoñ nahīñ jaate

gul ban ke mere dil mein sanwar kyon nahin jate

ab sham hui jati hai ghar kyon nahin jate

tum wa'da nibhane ko bhi tayyar nahin ho

Darte ho to wa'don se mukar kyon nahin jate

KHali hain meri chashm ke sahba-e-tarannum

ek bar ko aa kar inhen bhar kyon nahin jate

be-wajh bhaTakte ho jahan-bhar mein liye dil

ye 'ishq ka rasta hai idhar kyon nahin jate

har bar thama dete ho guldasta unhen tum

tohfe mein kabhi le ke jigar kyon nahin jate

tum zist ki KHushbu ho ujala ho chamak ho

jate hue mujh ko bhi hunar kyon nahin jate

ek bar ko jaane se kahan hota hai hasil

dil-basti mein tum bar-e-digar kyon nahin jate

main ne bhi kabhi aana tha shikwa hai ye lekin

tum chhoD ke kuchh raKHt-e-safar kyon nahin jate

jalti hi chali jati hai ye dard ki aatish

'kawish' kabhi is dard se bhar kyon nahin jate