gul-e-KHulus ki tarsil mein kami nahin ki

gul-e-ḳhulūs kī tarsīl meñ kamī nahīñ kī

ḳhudā-gavāh ki tā.īd-e-be-ruḳhī nahīñ kī

nigāh-e-bad na tirī aa.ī yaad ko lag jaa.e

isī ḳhayāl se kamre meñ raushnī nahīñ kī

tirī galī se bhī ḳhud ko hasīñ samajhte the

so maiñ ne aise nazāroñ se baat hī nahīñ kī

uchaTtī ek nazar terī paḌ ga.ī jab se

kisī se ham ne zamāne meñ dostī nahīñ kī

ḳhirad kī masnad-e-uzmā bichhāo us ke liye

miyān-e-dasht-e-junūñ jis ne zindagī nahīñ kī

ye kaisā zo.am thā kin ālamoñ meñ rahtā thā

diye ne kis liye bai'at charāġh kī nahīñ kī

tumhīñ batāo mulāqāt se hai kyā hāsil

jo baat karnī thī us se agar vahī nahīñ kī

hamārī pyaas ke sahrā meñ būd-o-bāsh to hai

magar shikāyat-e-tishna-labī kabhī nahīñ kī

ḳhazāna ilm-o-hunar kā luTā rahā hai vo 'nūr'

barā.e nāmvarī us ne shā.erī nahīñ kī

gul-e-KHulus ki tarsil mein kami nahin ki

KHuda-gawah ki taid-e-be-ruKHi nahin ki

nigah-e-bad na teri aai yaad ko lag jae

isi KHayal se kamre mein raushni nahin ki

teri gali se bhi KHud ko hasin samajhte the

so main ne aise nazaron se baat hi nahin ki

uchaTti ek nazar teri paD gai jab se

kisi se hum ne zamane mein dosti nahin ki

KHirad ki masnad-e-uzma bichhao us ke liye

miyan-e-dasht-e-junun jis ne zindagi nahin ki

ye kaisa zoam tha kin aalamon mein rahta tha

diye ne kis liye bai'at charagh ki nahin ki

tumhin batao mulaqat se hai kya hasil

jo baat karni thi us se agar wahi nahin ki

hamari pyas ke sahra mein bud-o-bash to hai

magar shikayat-e-tishna-labi kabhi nahin ki

KHazana ilm-o-hunar ka luTa raha hai wo 'nur'

barae namwari us ne shaeri nahin ki