gul milenge yahan par har ek rang ke aap aaen mere gulsitan ki taraf

gul mileñge yahāñ par har ik rang ke aap aa.eñ mire gulsitāñ kī taraf

bū-e-ulfat isī kī bahāroñ meñ haiñ log jaa.eñ to jaa.eñ ḳhizāñ kī taraf

ye mirī anjuman hai yahāñ kuchh nahīñ juz haqīqat yahāñ par bayāñ kuchh nahīñ

aao samjho mire qalb kā mudda.ā sirf jaao na merī zabāñ kī taraf

sar jhukāne se inkār kab hai mujhe bahr-e-masjūd pās-e-adab hai mujhe

sajda-e-shukr bhī kufr ho jā.egā dil jo maa.il hai husn-e-butāñ kī taraf

aql se māvarā hai maqām-e-junūñ sab hī ahl-e-ḳhirad haiñ yahāñ sar-nigūñ

chalte chalte yahāñ kārvāñ ruk gayā manzileñ ḳhud baḌhīñ kārvāñ kī taraf

jab zabāñ kholiye soch kar boliye apne har lafz ko aql par toliye

tiir 'āsī' kamāñ se jo chhuT kar gayā phir vo aatā nahīñ hai kamāñ kī taraf

gul milenge yahan par har ek rang ke aap aaen mere gulsitan ki taraf

bu-e-ulfat isi ki bahaaron mein hain log jaen to jaen KHizan ki taraf

ye meri anjuman hai yahan kuchh nahin juz haqiqat yahan par bayan kuchh nahin

aao samjho mere qalb ka muddaa sirf jao na meri zaban ki taraf

sar jhukane se inkar kab hai mujhe bahr-e-masjud pas-e-adab hai mujhe

sajda-e-shukr bhi kufr ho jaega dil jo mail hai husn-e-butan ki taraf

aql se mawara hai maqam-e-junun sab hi ahl-e-KHirad hain yahan sar-nigun

chalte chalte yahan karwan ruk gaya manzilen KHud baDhin karwan ki taraf

jab zaban kholiye soch kar boliye apne har lafz ko aql par toliye

tir 'asi' kaman se jo chhuT kar gaya phir wo aata nahin hai kaman ki taraf