گل ملیں گے یہاں پر ہر اک رنگ کے آپ آئیں مرے گلستاں کی طرف

گل ملیں گے یہاں پر ہر اک رنگ کے آپ آئیں مرے گلستاں کی طرف

بوئے الفت اسی کی بہاروں میں ہیں لوگ جائیں تو جائیں خزاں کی طرف

یہ مری انجمن ہے یہاں کچھ نہیں جز حقیقت یہاں پر بیاں کچھ نہیں

آؤ سمجھو مرے قلب کا مدعا صرف جاؤ نہ میری زباں کی طرف

سر جھکانے سے انکار کب ہے مجھے بہر مسجود پاس ادب ہے مجھے

سجدۂ شکر بھی کفر ہو جائے گا دل جو مائل ہے حسن بتاں کی طرف

عقل سے ماورا ہے مقام جنوں سب ہی اہل خرد ہیں یہاں سرنگوں

چلتے چلتے یہاں کارواں رک گیا منزلیں خود بڑھیں کارواں کی طرف

جب زباں کھولیے سوچ کر بولئے اپنے ہر لفظ کو عقل پر تولیے

تیر آسیؔ کماں سے جو چھٹ کر گیا پھر وہ آتا نہیں ہے کماں کی طرف