gul meri jaanib uTha kar phenkiye

gul mirī jānib uThā kar pheñkiye

ba.ad meñ chāheñ to nashtar pheñkiye

ātish-e-ulfat na bujhne pā.egī

laakh ab is par samundar pheñkiye

ye nahīñ kahtī safā.ī kī muhim

ghar ke kachre ko saḌak par pheñkiye

paap gañgā meñ bahā dījegā aur

nekiyāñ dariyā meñ jā kar pheñkiye

is tarah samjhauta ho saktā nahīñ

aap pahle apnā ḳhanjar pheñkiye

aag siine meñ na lag jaa.e kahīñ

dard kī cigarette bujhā kar pheñkiye

dījiye roTī bhī izzat se use

yuuñ nahīñ samt-e-qalandar pheñkiye

naach kar dikhlā.egā insān bhī

us ke aage thoḌī chilllar pheñkiye

choT 'anjum' aap ko lag jā.egī

āsmāñ par yuuñ na patthar pheñkiye

gul meri jaanib uTha kar phenkiye

baad mein chahen to nashtar phenkiye

aatish-e-ulfat na bujhne paegi

lakh ab is par samundar phenkiye

ye nahin kahti safai ki muhim

ghar ke kachre ko saDak par phenkiye

pap ganga mein baha dijega aur

nekiyan dariya mein ja kar phenkiye

is tarah samjhauta ho sakta nahin

aap pahle apna KHanjar phenkiye

aag sine mein na lag jae kahin

dard ki cigarette bujha kar phenkiye

dijiye roTi bhi izzat se use

yun nahin samt-e-qalandar phenkiye

nach kar dikhlaega insan bhi

us ke aage thoDi chilllar phenkiye

choT 'anjum' aap ko lag jaegi

aasman par yun na patthar phenkiye