gul nahin Khaar samajhte hain mujhe

gul nahīñ ḳhaar samajhte haiñ mujhe

sab girāñ-bār samajhte haiñ mujhe

haiñ añdhere bhī gurezāñ mujh se

chashm-e-bedār samajhte haiñ mujhe

merī peshānī pe mehrāb nahīñ

vo gunahgār samajhte haiñ mujhe

daulat-e-dard merā sarmāya

kyuuñ vo nādār samajhte haiñ mujhe

duur baiThe haiñ mirī mahfil se

vaj.h-e-āzār samajhte haiñ mujhe

chāra-gar bhī haiñ gurezāñ mujh se

terā bīmār samajhte haiñ mujhe

kyā kahūñ un se ma.āl-e-ulfat

jo tirī haar samajhte haiñ mujhe

merī ġhurbat nahīñ khultī mujh par

log zardār samajhte haiñ mujhe

merā isbāt mohabbat hai mirī

aur vo inkār samajhte haiñ mujhe

maiñ nahīñ bazm se jaane vaalī

ahl-e-darbār samajhte haiñ mujhe

kab samajhnā vo mujhe chāhte haiñ

kār-e-dushvār samajhte haiñ mujhe

kyuuñ 'sahar' haal sunā.ūñ un ko

mere ġham-ḳhvār samajhte haiñ mujhe

gul nahin KHar samajhte hain mujhe

sab giran-bar samajhte hain mujhe

hain andhere bhi gurezan mujh se

chashm-e-bedar samajhte hain mujhe

meri peshani pe mehrab nahin

wo gunahgar samajhte hain mujhe

daulat-e-dard mera sarmaya

kyun wo nadar samajhte hain mujhe

dur baiThe hain meri mahfil se

wajh-e-azar samajhte hain mujhe

chaara-gar bhi hain gurezan mujh se

tera bimar samajhte hain mujhe

kya kahun un se maal-e-ulfat

jo teri haar samajhte hain mujhe

meri ghurbat nahin khulti mujh par

log zardar samajhte hain mujhe

mera isbaat mohabbat hai meri

aur wo inkar samajhte hain mujhe

main nahin bazm se jaane wali

ahl-e-darbar samajhte hain mujhe

kab samajhna wo mujhe chahte hain

kar-e-dushwar samajhte hain mujhe

kyun 'sahar' haal sunaun un ko

mere gham-KHwar samajhte hain mujhe