gul shagufta hain nasim-e-sahari aai hai

gul shagufta haiñ nasīm-e-saharī aa.ī hai

kis kī aamad hai ye kaisī chaman-ārā.ī hai

na asar hai na rasā.ī na to sunvā.ī hai

aah aa.ī bhī tabī.at to kahāñ aa.ī hai

hijr kī raat jo aa.ī hai to kyoñ aa.ī hai

mujh ko ma.alūm hai paiġhām-e-qazā laa.ī hai

tāqat-e-zabt na ab tāb-e-shakebā.ī hai

hai bajā hoñToñ pe fariyād agar aa.ī hai

jald aa jā kahīñ tū bhī ki hai vaqt-e-ruḳhsat

tere bīmār ko lene ko qazā aa.ī hai

maut se pahle jo marnā hai vo marnā hai yahī

dil kahīñ aa.e to samjho ki qazā aa.ī hai

dekhtā rahtā hai ā.īne meñ shoḳhī apnī

kyā tamāsha hai vo ḳhud apnā tamāshā.ī hai

pūchhiye us se ki hai dard-e-mohabbat kaisā

jis ne ye choT kaleje pe kabhī khaa.ī hai

un ke jalvoñ kī ye tauqīr ye azmat ye shaan

merī āñkhoñ meñ mire dil meñ jagah paa.ī hai

naqd-e-jāñ de ke mohabbat meñ alam se chhūTe

is tarīqe se ġharaz ham ne jagah paa.ī hai

ḳhair ho kaun sī uftād paḌī ai 'sābir'

dil Thikāne nahīñ āvāz bhī bhar aa.ī hai

gul shagufta hain nasim-e-sahari aai hai

kis ki aamad hai ye kaisi chaman-arai hai

na asar hai na rasai na to sunwai hai

aah aai bhi tabiat to kahan aai hai

hijr ki raat jo aai hai to kyon aai hai

mujh ko malum hai paigham-e-qaza lai hai

taqat-e-zabt na ab tab-e-shakebai hai

hai baja honTon pe fariyaad agar aai hai

jald aa ja kahin tu bhi ki hai waqt-e-ruKHsat

tere bimar ko lene ko qaza aai hai

maut se pahle jo marna hai wo marna hai yahi

dil kahin aae to samjho ki qaza aai hai

dekhta rahta hai aaine mein shoKHi apni

kya tamasha hai wo KHud apna tamashai hai

puchhiye us se ki hai dard-e-mohabbat kaisa

jis ne ye choT kaleje pe kabhi khai hai

un ke jalwon ki ye tauqir ye azmat ye shan

meri aankhon mein mere dil mein jagah pai hai

naqd-e-jaan de ke mohabbat mein alam se chhuTe

is tariqe se gharaz hum ne jagah pai hai

KHair ho kaun si uftad paDi ai 'sabir'

dil Thikane nahin aawaz bhi bhar aai hai