gul zaKHm ko aansu ko guhar humne kaha hai

gul zaḳhm ko aañsū ko guhar ham ne kahā hai

har aib-e-mohabbat ko hunar ham ne kahā hai

ra.anā.ī-e-jalva ko ba-sad husn-e-tayaqqun

ḳhud apnā hī ik aks-e-nazar ham ne kahā hai

kuchh baat to hai jis ke sabab saare jahāñ meñ

ai dost tujhe ḳhuld-nazar ham ne kahā hai

kahne ko rah-e-shauq meñ raahī to bahut the

manzil ko magar gard-e-safar ham ne kahā hai

ho jin se ġham-e-tīrgī-e-shab kā mudāvā

aise hī ujāloñ ko sahar ham ne kahā hai

haq-goī kā anjām samajh kar bhī ai 'manshā'

jo kahnā thā be-ḳhauf-o-ḳhatar ham ne kahā hai

gul zaKHm ko aansu ko guhar hum ne kaha hai

har aib-e-mohabbat ko hunar hum ne kaha hai

ranai-e-jalwa ko ba-sad husn-e-tayaqqun

KHud apna hi ek aks-e-nazar hum ne kaha hai

kuchh baat to hai jis ke sabab sare jahan mein

ai dost tujhe KHuld-nazar hum ne kaha hai

kahne ko rah-e-shauq mein rahi to bahut the

manzil ko magar gard-e-safar hum ne kaha hai

ho jin se gham-e-tirgi-e-shab ka mudawa

aise hi ujalon ko sahar hum ne kaha hai

haq-goi ka anjam samajh kar bhi ai 'mansha'

jo kahna tha be-KHauf-o-KHatar hum ne kaha hai