gulab kanTon mein jis tarh muskuraate hain

gulāb kāñToñ meñ jis tarh muskurāte haiñ

ham apnā dard zamāne se yuuñ chhupāte haiñ

amiir log banā lete haiñ makān ūñche

ġharīb logoñ se yuuñ dūriyāñ banāte haiñ

na dekh in ko haqārat se kaam ke haiñ log

pasīna apnā ye mazdūr jo bahāte haiñ

vo log Darte nahīñ haiñ kisī bhī āñdhī se

mohabbatoñ ke charāġhoñ ko jo jalāte haiñ

jo bā-zamīr haiñ ḳhud.dār haiñ tabī'at se

nahīñ batāte vo majbūriyāñ chhupāte haiñ

hamāre lafz haiñ raushan charāġhoñ kī mānind

hamāre lafz chamakte haiñ jagmagāte haiñ

hamārā kaam bahut ahmiyat kā hai 'yāsīn'

jo log so.e hue haiñ unheñ jagāte haiñ

gulab kanTon mein jis tarh muskuraate hain

hum apna dard zamane se yun chhupate hain

amir log bana lete hain makan unche

gharib logon se yun duriyan banate hain

na dekh in ko haqarat se kaam ke hain log

pasina apna ye mazdur jo bahate hain

wo log Darte nahin hain kisi bhi aandhi se

mohabbaton ke charaghon ko jo jalate hain

jo ba-zamir hain KHuddar hain tabi'at se

nahin batate wo majburiyan chhupate hain

hamare lafz hain raushan charaghon ki manind

hamare lafz chamakte hain jagmagate hain

hamara kaam bahut ahmiyat ka hai 'yasin'

jo log soe hue hain unhen jagate hain