gulab samjha hua tha jinko wo Khaar nikle

gulāb samjhā huā thā jin ko vo ḳhaar nikle

hamāre dushman hamāre apne hī yaar nikle

kabhī kabhī dard dil meñ nikle to yuuñ lage hai

ki jaise mere badan se kuchh ār-pār nikle

vo log jo ḳhud ko zabt kā rab batā rahe the

paḌī jo mushkil to ek jhaTke kī maar nikle

maiñ haq pe huuñ jaan kar bhī koī nahīñ mire saath

muḳhālifat meñ mirī magar be-shumār nikle

usī ke dil par asar nahīñ ho sakā vagarna

hamārī āñkhoñ se ashk to baar baar nikle

hamārī qismat meñ Dūbnā likh diyā gayā thā

vagarna jo log saath the vo to paar nikle

maiñ chāhtā huuñ tū mujh pe bilkul na jaa.e beTā

maiñ chāhtā huuñ ki tū ibādat-guzār nikle

zabāñ nahīñ saath de sakī merā 'mehdī' varna

mirī to koshish yahī thī dil kā ġhubār nikle

gulab samjha hua tha jin ko wo KHar nikle

hamare dushman hamare apne hi yar nikle

kabhi kabhi dard dil mein nikle to yun lage hai

ki jaise mere badan se kuchh aar-par nikle

wo log jo KHud ko zabt ka rab bata rahe the

paDi jo mushkil to ek jhaTke ki mar nikle

main haq pe hun jaan kar bhi koi nahin mere sath

muKHalifat mein meri magar be-shumar nikle

usi ke dil par asar nahin ho saka wagarna

hamari aankhon se ashk to bar bar nikle

hamari qismat mein Dubna likh diya gaya tha

wagarna jo log sath the wo to par nikle

main chahta hun tu mujh pe bilkul na jae beTa

main chahta hun ki tu ibaadat-guzar nikle

zaban nahin sath de saki mera 'mehdi' warna

meri to koshish yahi thi dil ka ghubar nikle