ghulam sar pe ibaadat abhi na rakkhi jae

ġhulām sar pe ibādat abhī na rakkhī jaa.e

ḳhudā ke naam baġhāvat abhī na rakkhī jaa.e

maiñ Thīk-Thāk to kar luuñ hasab-nasab apnā

lahū pe shart-e-nadāmat abhī na rakkhī jaa.e

ki jis kī aañch se jibra.īl-e-āgahī jhulseñ

anā meñ itnī tamāzat abhī na rakkhī jaa.e

hamāre shahr kī miTTī hai shar-pasand bahut

yahāñ fasīl-e-hifāzat abhī na rakkhī jaa.e

bahisht-rañg murādoñ kī jā-namāzoñ par

munāfiqoñ kī siyāsat abhī na rakkhī jaa.e

safed-poshī-e-zillat bahut hai jiine ko

sar-e-janāb-e-sharāfat abhī na rakkhī jaa.e

hamāre ḳhuuñ se ibārat hai shajra-e-tahzīb

yahāñ pe mohr-e-siyādat abhī na rakkhī jaa.e

ghulam sar pe ibaadat abhi na rakkhi jae

KHuda ke nam baghawat abhi na rakkhi jae

main Thik-Thak to kar lun hasab-nasab apna

lahu pe shart-e-nadamat abhi na rakkhi jae

ki jis ki aanch se jibrail-e-agahi jhulsen

ana mein itni tamazat abhi na rakkhi jae

hamare shahr ki miTTi hai shar-pasand bahut

yahan fasil-e-hifazat abhi na rakkhi jae

bahisht-rang muradon ki ja-namazon par

munafiqon ki siyasat abhi na rakkhi jae

safed-poshi-e-zillat bahut hai jine ko

sar-e-janab-e-sharafat abhi na rakkhi jae

hamare KHun se ibarat hai shajra-e-tahzib

yahan pe mohr-e-siyaadat abhi na rakkhi jae