gulon ka husn bhi main raunaq-e-bahaar bhi main

guloñ kā husn bhī maiñ raunaq-e-bahār bhī maiñ

ḳhizāñ-rasīda sī Tahnī pe nok-e-ḳhār bhī maiñ

shikast-ḳhurda bhī maiñ fat.h kā ḳhumār bhī maiñ

jo girte girte sañbhal jaa.e vo savār bhī maiñ

jadīd lamhe bhī mere hisār-e-zāt meñ haiñ

aur apne purkhoñ kī 'azmat kī yādgār bhī maiñ

bichhaḌ ke us kī mujhe yaad tak nahīñ aa.ī

ye aur baat ki rahtā huuñ be-qarār bhī maiñ

ḳhudā kā shukr ki har chiiz us ne baḳhshī hai

magar mazīd 'ināyat kā ḳhvāst-gār bhī maiñ

ye kā.enāt banā.ī ga.ī hai mere liye

har ek manzar-e-hastī kā rāzdār bhī maiñ

na.ī 'imārateñ bhī mere naam se mansūb

purāne shahr kī galiyoñ kā iftiḳhār bhī maiñ

ye sach hai mamlikat-e-she’r kā huuñ shahzāda

agar ḳhulūs se dekho to tājdār bhī maiñ

hai merī zaat bhī minjumla-e-sifāt 'atīq'

anā-shanās bhī maiñ rūh-e-inkisār bhī maiñ

gulon ka husn bhi main raunaq-e-bahaar bhi main

KHizan-rasida si Tahni pe nok-e-KHar bhi main

shikast-KHurda bhi main fath ka KHumar bhi main

jo girte girte sanbhal jae wo sawar bhi main

jadid lamhe bhi mere hisar-e-zat mein hain

aur apne purkhon ki 'azmat ki yaadgar bhi main

bichhaD ke us ki mujhe yaad tak nahin aai

ye aur baat ki rahta hun be-qarar bhi main

KHuda ka shukr ki har chiz us ne baKHshi hai

magar mazid 'inayat ka KHwast-gar bhi main

ye kaenat banai gai hai mere liye

har ek manzar-e-hasti ka raazdar bhi main

nai 'imaraten bhi mere nam se mansub

purane shahr ki galiyon ka iftiKHar bhi main

ye sach hai mamlikat-e-she’r ka hun shahzada

agar KHulus se dekho to tajdar bhi main

hai meri zat bhi minjumla-e-sifat 'atiq'

ana-shanas bhi main ruh-e-inkisar bhi main