gulon ke chehra-e-rangin pe wo nikhaar nahin

guloñ ke chehra-e-rañgīñ pe vo nikhār nahīñ

bahār aa.ī magar ālam-e-bahār nahīñ

jo haath aatā hai dāman to chhoḌ detā huuñ

junūñ-navāz abhī mausam-e-bahār nahīñ

kisī kī yaad kā 'ālam na pūchhiye mujh se

kabhī qarār hai dil ko kabhī qarār nahīñ

ye bāñkpan ye adā ye shabāb kā 'ālam

tum aa ga.e to kisī kā ab intizār nahīñ

bahār par bhī ḳhizāñ hī kā rang ġhālib hai

havā zamāne kī gulshan ko sāzgār nahīñ

hamāre sāmne vo haiñ kahīñ ye ḳhvāb na ho

ab apnī āñkhoñ pe bhī ham ko e’tibār nahīñ

ḳhud aa ga.e haiñ simaT kar nigāh meñ jalve

visāl-e-dost hai ye ranj-e-intizār nahīñ

mirā mazāq uḌātā hai ā.īna lekin

mirī haqīqat-e-ġham us pe āshkār nahīñ

hamārī ābla-pā.ī kā faiz kyā kahiye

vo kaun sā hai bayābāñ jo lāla-zār nahīñ

butoñ ko puuj rahā hai tire tasavvur meñ

gunāh kar ke bhī 'faizī' gunāhgār nahīñ

gulon ke chehra-e-rangin pe wo nikhaar nahin

bahaar aai magar aalam-e-bahaar nahin

jo hath aata hai daman to chhoD deta hun

junun-nawaz abhi mausam-e-bahaar nahin

kisi ki yaad ka 'alam na puchhiye mujh se

kabhi qarar hai dil ko kabhi qarar nahin

ye bankpan ye ada ye shabab ka 'alam

tum aa gae to kisi ka ab intizar nahin

bahaar par bhi KHizan hi ka rang ghaalib hai

hawa zamane ki gulshan ko sazgar nahin

hamare samne wo hain kahin ye KHwab na ho

ab apni aankhon pe bhi hum ko e’tibar nahin

KHud aa gae hain simaT kar nigah mein jalwe

visal-e-dost hai ye ranj-e-intizar nahin

mera mazaq uData hai aaina lekin

meri haqiqat-e-gham us pe aashkar nahin

hamari aabla-pai ka faiz kya kahiye

wo kaun sa hai bayaban jo lala-zar nahin

buton ko puj raha hai tere tasawwur mein

gunah kar ke bhi 'faizi' gunahgar nahin