gulon ke parde mein shaklen hain mah-jabinon ki

guloñ ke parde meñ shakleñ haiñ mah-jabīnoñ kī

ye Dāliyāñ haiñ ki haiñ Doliyāñ hasīnoñ kī

ye āstīneñ nahīñ haiñ chunī huī zālim

balā.eñ lī haiñ nigāhoñ se āstīnoñ kī

kisī ke jalve sar-e-arsh chhup nahīñ sakte

ki duur rasan haiñ nigāheñ buland bīnoñ kī

pas-e-fanā bhī na ḳhālī raheñ ye qasr-e-rafī.a

na hoñ makīn to qabreñ raheñ makīnoñ kī

kis intihā kī nazākat hai mere sheroñ meñ

nazar lage na kahīñ un ko nukta-chīnoñ kī

jo niiñd aa.e to yuuñ aa.e maut aa.e to yuuñ

hamāre sāmne shakleñ hoñ mah-jabīnoñ kī

ham apne mulk-e-suḳhan ko vasī.a karte haiñ

hameñ talāsh hai har-dam na.ī zamīnoñ kī

unheñ ġharaz mirī bāteñ khaḌe khaḌe sun leñ

suneñge baiTh ke vo apne ham-nashīnoñ kī

kahāñ vo chāñdnī rāteñ vo chāñd ke TukḌe

na ab vo ham haiñ na shakleñ haiñ mah-jabīnoñ kī

utarte haiñ na.e mazmūñ jo āsmāñ se 'riyāz'

talāsh rahtī hai ham ko na.ī zamīnoñ kī

gulon ke parde mein shaklen hain mah-jabinon ki

ye Daliyan hain ki hain Doliyan hasinon ki

ye aastinen nahin hain chuni hui zalim

balaen li hain nigahon se aastinon ki

kisi ke jalwe sar-e-arsh chhup nahin sakte

ki dur rasan hain nigahen buland binon ki

pas-e-fana bhi na KHali rahen ye qasr-e-rafia

na hon makin to qabren rahen makinon ki

kis intiha ki nazakat hai mere sheron mein

nazar lage na kahin un ko nukta-chinon ki

jo nind aae to yun aae maut aae to yun

hamare samne shaklen hon mah-jabinon ki

hum apne mulk-e-suKHan ko wasia karte hain

hamein talash hai har-dam nai zaminon ki

unhen gharaz meri baaten khaDe khaDe sun len

sunenge baiTh ke wo apne ham-nashinon ki

kahan wo chandni raaten wo chand ke TukDe

na ab wo hum hain na shaklen hain mah-jabinon ki

utarte hain nae mazmun jo aasman se 'riyaz'

talash rahti hai hum ko nai zaminon ki