gulon ko baKHsh ke zaKHmon ki tazgi maine

guloñ ko baḳhsh ke zaḳhmoñ kī tāzgī maiñ ne

bahār-e-murda meñ ik jaan Daal dī maiñ ne

firāq-e-yār meñ har saañs umr-e-ḳhizr huī

hayāt paa.ī hai qismat se dā.imī maiñ ne

jalā ke apne hī hāthoñ se tinke tinke ko

miTā.ī baḳht-e-nasheman kī tīrgī maiñ ne

na jaane kaun sī manzil hai dil ke pesh-e-nazar

ki ḳhāk-e-ālam-e-imkāñ to chhān lī maiñ ne

Tapak ke bah ga.e qalb-o-jigar bhī āñkhoñ se

mazāq-e-girya ko samjhā thā ik hañsī maiñ ne

sar-e-niyāz dar-e-nāz se uThā na sakā

kī ek sajde meñ takmīl-e-bandagī maiñ ne

machal ke rah ga.e āġhosh-e-chashm meñ aañsū

taḌap ke zabt-e-mohabbat kī daad dī maiñ ne

yahāñ to marg-e-musalsal se paḌ gayā paalā

ilāhī zindagī māñgī thī zindagī maiñ ne

na mil sakā kahīñ matlūb-e-bandagī 'afsar'

tajalliyāt kī duniyā bhī dekh lī maiñ ne

gulon ko baKHsh ke zaKHmon ki tazgi main ne

bahaar-e-murda mein ek jaan Dal di main ne

firaq-e-yar mein har sans umr-e-KHizr hui

hayat pai hai qismat se daimi main ne

jala ke apne hi hathon se tinke tinke ko

miTai baKHt-e-nasheman ki tirgi main ne

na jaane kaun si manzil hai dil ke pesh-e-nazar

ki KHak-e-alam-e-imkan to chhan li main ne

Tapak ke bah gae qalb-o-jigar bhi aankhon se

mazaq-e-girya ko samjha tha ek hansi main ne

sar-e-niyaz dar-e-naz se uTha na saka

ki ek sajde mein takmil-e-bandagi main ne

machal ke rah gae aaghosh-e-chashm mein aansu

taDap ke zabt-e-mohabbat ki dad di main ne

yahan to marg-e-musalsal se paD gaya pala

ilahi zindagi mangi thi zindagi main ne

na mil saka kahin matlub-e-bandagi 'afsar'

tajalliyat ki duniya bhi dekh li main ne