gulon ko karte hue jab kalam dekha tha

guloñ ko karte hue jab kalām dekhā thā

vo paḌh rahe the unhī par salām dekhā thā

kitāb-e-zīst ke safhe palaT rahā thā maiñ

jahāñ ḳhushī thī vahāñ terā naam dekhā thā

mahak rahī hai abhī tak ye zindagī merī

zamīn-e-dil pe gul-e-nā-tamām dekhā thā

sunā hai ab bhī vahāñ par gulāb ugte haiñ

tumhārā raqs jahāñ sub.h-o-shām dekhā thā

kuchh aise dekhā tumhāre shabāb ko maiñ ne

kisī ne jaise nazar bhar ke jaam dekhā thā

vo ek vaqt thā to 'ājizī kā paikar thā

zamāne bhar meñ tirā ehtirām dekhā thā

sazā milī thī hameñ sāf-goī kī 'ansar'

har ik nigāh meñ bas intiqām dekhā thā

gulon ko karte hue jab kalam dekha tha

wo paDh rahe the unhi par salam dekha tha

kitab-e-zist ke safhe palaT raha tha main

jahan KHushi thi wahan tera nam dekha tha

mahak rahi hai abhi tak ye zindagi meri

zamin-e-dil pe gul-e-na-tamam dekha tha

suna hai ab bhi wahan par gulab ugte hain

tumhaara raqs jahan subh-o-sham dekha tha

kuchh aise dekha tumhaare shabab ko main ne

kisi ne jaise nazar bhar ke jam dekha tha

wo ek waqt tha to 'ajizi ka paikar tha

zamane bhar mein tera ehtiram dekha tha

saza mili thi hamein saf-goi ki 'ansar'

har ek nigah mein bas intiqam dekha tha