gulon ne muskurane ki saza pai to kya hoga

guloñ ne muskurāne kī sazā paa.ī to kyā hogā

sazā-e-gul pe ġhunchoñ ko hañsī aa.ī to kyā hogā

kahīñ bedād-e-gulchīñ se pareshāñ ho ke ġhunchoñ ne

gulistāñ meñ na khilne kī qasam khaa.ī to kyā hogā

ye mere ashk mere rāz-dāñ haiñ mujh se kahte haiñ

agar ho bhī ga.ī bil-farz rusvā.ī to kyā hogā

ye nā-mumkin nahīñ mil jaa.eñ do ik jaam māñge se

magar ye tishnagī phir bhī na miT paa.ī to kyā hogā

mirī jānib se raaz ifshā na hogā hai yaqīñ mujh ko

sar-e-mahfil vo chashm-e-nāz sharmā.ī to kyā hogā

abhī to azm-e-tark-e-bāda-noshī hai ḳhudā jaane

kabhī tauba mirī shīshe se Takrā.ī to kyā hogā

duā thī aa.eñ vo yā phir qazā aa.e vo kahte haiñ

kahīñ ab un se pahle hī qazā aa.ī to kyā hogā

abhī to hai shikāyat 'nūr' ko un ke taġhāful se

magar ḳhud us ke jazboñ meñ kamī aa.ī to kyā hogā

gulon ne muskurane ki saza pai to kya hoga

saza-e-gul pe ghunchon ko hansi aai to kya hoga

kahin bedad-e-gulchin se pareshan ho ke ghunchon ne

gulistan mein na khilne ki qasam khai to kya hoga

ye mere ashk mere raaz-dan hain mujh se kahte hain

agar ho bhi gai bil-farz ruswai to kya hoga

ye na-mumkin nahin mil jaen do ek jam mange se

magar ye tishnagi phir bhi na miT pai to kya hoga

meri jaanib se raaz ifsha na hoga hai yaqin mujh ko

sar-e-mahfil wo chashm-e-naz sharmai to kya hoga

abhi to azm-e-tark-e-baada-noshi hai KHuda jaane

kabhi tauba meri shishe se Takrai to kya hoga

dua thi aaen wo ya phir qaza aae wo kahte hain

kahin ab un se pahle hi qaza aai to kya hoga

abhi to hai shikayat 'nur' ko un ke taghaful se

magar KHud us ke jazbon mein kami aai to kya hoga