gulon se dur jaane ka irada to kiya tha

guloñ se duur jaane kā irāda to kiyā thā

havā se ḳhushbuoñ ne istifāda to kiyā thā

ham ik duuje se elān-e-masarrat kar na paa.e

bichhaḌ ke ham ne ḳhush rahne kā va.ada to kiyā thā

magar dil ho gayā merā sipurd-e-raqs-e-vahshat

kisī ke ishq meñ dil ko kushāda to kiyā thā

tirī maḳhmūr āñkhoñ kī ibārat yaad aa.ī

kisī ne aaj zikr-e-jām-o-bāda to kiyā thā

nazar aane lagā rang-e-fareb-o-makr us meñ

ba-zāhir us ne kuchh din ḳhud ko saada to kiyā thā

libās-e-amn par kyoñ gard-e-nafrat jam ga.ī hai

miyāñ tum ne mohabbat ko labāda to kiyā thā

ḳhasāre meñ hai dil koī to 'dilbar' ko bulā.e

yahāñ us ne kam-az-kam ko ziyāda to kiyā thā

gulon se dur jaane ka irada to kiya tha

hawa se KHushbuon ne istifada to kiya tha

hum ek duje se elan-e-masarrat kar na pae

bichhaD ke hum ne KHush rahne ka wada to kiya tha

magar dil ho gaya mera sipurd-e-raqs-e-wahshat

kisi ke ishq mein dil ko kushada to kiya tha

teri maKHmur aankhon ki ibarat yaad aai

kisi ne aaj zikr-e-jam-o-baada to kiya tha

nazar aane laga rang-e-fareb-o-makr us mein

ba-zahir us ne kuchh din KHud ko sada to kiya tha

libas-e-amn par kyon gard-e-nafrat jam gai hai

miyan tum ne mohabbat ko labaada to kiya tha

KHasare mein hai dil koi to 'dilbar' ko bulae

yahan us ne kam-az-kam ko ziyaada to kiya tha