gulon se wasl ke paiman hawa ne likkhe the

guloñ se vasl ke paimāñ havā ne likkhe the

nasīb-e-shāḳh magar tāziyāne likkhe the

tirā visāl hī zarḳheziyoñ kā lamha thā

phir is ke ba.ad to banjar zamāne likkhe the

kabhī to paḌhtā mirā shahryār bhī un ko

jo bām-o-dar pe navishte qazā ne likkhe the

saroñ se girne lagīñ jab hamārī dastāreñ

in āñdhiyoñ meñ hameñ sar bachāne likkhe the

tamām umr mirī sogvār guzrī hai

nasīb mere kisī karbalā ne likkhe the

maiñ māntā hī nahīñ vā.izoñ kā ye maslak

ki is tarah hī mire din ḳhudā ne likkhe the

gulon se wasl ke paiman hawa ne likkhe the

nasib-e-shaKH magar taziyane likkhe the

tera visal hi zarKHeziyon ka lamha tha

phir is ke baad to banjar zamane likkhe the

kabhi to paDhta mera shahryar bhi un ko

jo baam-o-dar pe nawishte qaza ne likkhe the

saron se girne lagin jab hamari dastaren

in aandhiyon mein hamein sar bachane likkhe the

tamam umr meri sogwar guzri hai

nasib mere kisi karbala ne likkhe the

main manta hi nahin waizon ka ye maslak

ki is tarah hi mere din KHuda ne likkhe the