gulshan-ba-dosh nazren lab par hasin tarana

gulshan-ba-dosh nazreñ lab par hasīñ tarāna

har ik adā hai un kī ulfat kā ik fasāna

dīvāna-sāz gesū andāz-e-vālihāna

īmān lūTtā hai ye rang-e-kāfirāna

mahke hue laboñ par bahkā sā ye tabassum

phūloñ se Dhal rahā ho jaise sharāb-ḳhāna

ab tak nigāh meñ hai pahlī nigāh un kī

hañstī rahī mohabbat luTtā rahā zamāna

tāroñ kī bazm ho vo yā ho guloñ kī mahfil

har ek anjuman hai un kā hī jalva-ḳhana

un kī nazar panāheñ ḳhud dil meñ le rahī hai

bijlī ke saa.e meñ hai ab merā āshiyāna

kyā ho bayāñ kisī se tafsīr-e-husn-o-ulfat

sho.aloñ kī ik kahānī shabnam kā ik fasāna

duniyā-e-rang-o-bū meñ ye inqalāb-e-rangīñ

phūloñ kī haiñ jabīneñ kāñToñ kā āstāna

mujh ko 'shifā' miTānā āsāñ nahīñ hai koī

dekhūñ zarā muqābil aa.e mire zamāna

gulshan-ba-dosh nazren lab par hasin tarana

har ek ada hai un ki ulfat ka ek fasana

diwana-saz gesu andaz-e-walihana

iman luTta hai ye rang-e-kafirana

mahke hue labon par bahka sa ye tabassum

phulon se Dhal raha ho jaise sharab-KHana

ab tak nigah mein hai pahli nigah un ki

hansti rahi mohabbat luTta raha zamana

taron ki bazm ho wo ya ho gulon ki mahfil

har ek anjuman hai un ka hi jalwa-KHana

un ki nazar panahen KHud dil mein le rahi hai

bijli ke sae mein hai ab mera aashiyana

kya ho bayan kisi se tafsir-e-husn-o-ulfat

shoalon ki ek kahani shabnam ka ek fasana

duniya-e-rang-o-bu mein ye inqalab-e-rangin

phulon ki hain jabinen kanTon ka aastana

mujh ko 'shifa' miTana aasan nahin hai koi

dekhun zara muqabil aae mere zamana