gulshan bhi sajae hain isne ye jhalka hai shamshir mein bhi

gulshan bhī sajā.e haiñ is ne ye jhalkā hai shamshīr meñ bhī

insāñ ke lahū kā khel huā taḳhrīb meñ bhī ta.amīr meñ bhī

jo farq hai vo hai hāthoñ kā jo shauq-e-amal meñ baḌhte haiñ

yuuñ ek hī naġhma ek taḌap hai saaz meñ bhī shamshīr meñ bhī

chun chun ke ḳhirad ne nochā hai phūloñ kī qabāoñ ko lekin

kuchh dāman sālim rah hī ga.e is sorish-dār-o-gīr meñ bhī

ye sabr kī talqīñ aur TuuTe TuuTe jumle bahkī satreñ

jo tum ne chhupānā chāhā thā vo chhup na sakā tahrīr meñ bhī

sab apnī tarah se karte haiñ jiine ke jatan par kyā kiije

tadbīr nahīñ chaltī aksar is kār-gah-e-tadbīr meñ bhī

ye sādgī jo rañgīn bhī hai ye ḳhāmushī jo taqrīr bhī hai

vo ek tarah se lagte haiñ tahrīr meñ bhī tasvīr meñ bhī

gulshan bhi sajae hain is ne ye jhalka hai shamshir mein bhi

insan ke lahu ka khel hua taKHrib mein bhi tamir mein bhi

jo farq hai wo hai hathon ka jo shauq-e-amal mein baDhte hain

yun ek hi naghma ek taDap hai saz mein bhi shamshir mein bhi

chun chun ke KHirad ne nocha hai phulon ki qabaon ko lekin

kuchh daman salim rah hi gae is sorish-dar-o-gir mein bhi

ye sabr ki talqin aur TuTe TuTe jumle bahki satren

jo tum ne chhupana chaha tha wo chhup na saka tahrir mein bhi

sab apni tarah se karte hain jine ke jatan par kya kije

tadbir nahin chalti aksar is kar-gah-e-tadbir mein bhi

ye sadgi jo rangin bhi hai ye KHamushi jo taqrir bhi hai

wo ek tarah se lagte hain tahrir mein bhi taswir mein bhi