gulshan-e-dil mein mile aql ke sahra mein mile

gulshan-e-dil meñ mile aql ke sahrā meñ mile

jo bhī milnā hai mile aur isī duniyā meñ mile

barhamī anjuman-e-shauq kī kyā pūchhte ho

dost bichhḌe hue akasr saf-e-a.adā meñ mile

aane vāloñ ne mire ba.ad gavāhī dī hai

ka.ī gulzār mire naqsh-e-kaf-e-pā meñ mile

yuuñ bhī guzrī hai ki chhā.e rahe bedārī par

niiñd aa.ī to vo ġham ḳhvāb kī duniyā meñ mile

nahīñ mālūm ki kyā dekhne aa.e the udhar

be-ajar log bahut shahr-e-tamāshā meñ mile

phir umīdoñ ne yahīñ gaaḌ diye haiñ ḳheme

rañg kuchh uḌte hue dāman-e-sahrā meñ mile

fāsloñ se na mire shauq kī manzil naapo

shash-jihat said mire dām-e-tamannā meñ mile

gulshan-e-dil mein mile aql ke sahra mein mile

jo bhi milna hai mile aur isi duniya mein mile

barhami anjuman-e-shauq ki kya puchhte ho

dost bichhDe hue akasr saf-e-ada mein mile

aane walon ne mere baad gawahi di hai

kai gulzar mere naqsh-e-kaf-e-pa mein mile

yun bhi guzri hai ki chhae rahe bedari par

nind aai to wo gham KHwab ki duniya mein mile

nahin malum ki kya dekhne aae the udhar

be-ajar log bahut shahr-e-tamasha mein mile

phir umidon ne yahin gaD diye hain KHeme

rang kuchh uDte hue daman-e-sahra mein mile

faslon se na mere shauq ki manzil napo

shash-jihat said mere dam-e-tamanna mein mile