gulshan-e-ilm ki nikhat hun gul-e-tar main hun

gulshan-e-ilm kī nik.hat huuñ gul-e-tar maiñ huuñ

qadr-dāñ jis ke sabhī haiñ vo suḳhanvar maiñ huuñ

inqilābāt huuñ tahrīk huuñ mahshar maiñ huuñ

jis meñ āfāq samā jaa.eñ vo chādar maiñ huuñ

sirf ik sho'la mizājī hai mirī shān-e-vajūd

qatra-e-abr huuñ dariyā huuñ samundar maiñ huuñ

roz-e-avval se huā hai mujhe vahdat kā shu'ūr

jo parastār-e-haqīqat hai vo shankar maiñ huuñ

apnī fitrat se dahaktī huī dhūpeñ pī kar

sard paanī jo ugal detā hai kankar maiñ huuñ

mujh se aivān-e-imārat kī chunī har dīvār

ret kī shakl meñ rauñdā huā patthar maiñ huuñ

josh-e-dariyā mirī ḳhāmosh ravānī ko samajh

rah gayā thā jo kisī dhāre se kaT kar maiñ huuñ

apnī taḳhlīq pe hai naaz bajā hai 'māhir'

chashm-e-tanqīd-e-nigārāñ meñ huuñ bartar maiñ huuñ

gulshan-e-ilm ki nikhat hun gul-e-tar main hun

qadr-dan jis ke sabhi hain wo suKHanwar main hun

inqilabaat hun tahrik hun mahshar main hun

jis mein aafaq sama jaen wo chadar main hun

sirf ek sho'la mizaji hai meri shan-e-wajud

qatra-e-abr hun dariya hun samundar main hun

roz-e-awwal se hua hai mujhe wahdat ka shu'ur

jo parastar-e-haqiqat hai wo shankar main hun

apni fitrat se dahakti hui dhupen pi kar

sard pani jo ugal deta hai kankar main hun

mujh se aiwan-e-imarat ki chuni har diwar

ret ki shakl mein raunda hua patthar main hun

josh-e-dariya meri KHamosh rawani ko samajh

rah gaya tha jo kisi dhaare se kaT kar main hun

apni taKHliq pe hai naz baja hai 'mahir'

chashm-e-tanqid-e-nigaran mein hun bartar main hun