gulshan-e-lala-zar kya mausam-e-KHush-gawar kya

gulshan-e-lāla-zār kyā mausam-e-ḳhush-gavār kyā

jis kī bahār aap haiñ us ke liye bahār kyā

ruk to nahīñ ga.ī kahīñ gardish-e-rozgār kyā

tujh ko sukūñ se vāsta ai dil-e-be-qarār kyā

sīna-e-dāġh-dār dekh dīda-e-ashk-bār dekh

dil kī mire bahār dekh sho.abada-e-bahār kyā

raah na.ī banā.e jā tez qadam uThā.e jā

shauq-e-talab baḌhā.e jā fikr-e-ma.āl-e-kār kyā

ḳhauf hai phir na kuchh ḳhatar ishq agar hai rāhbar

ho ke qarīb-tar guzar fitna-e-rozgār kyā

ahl-e-chaman hī jab hameñ bhuul ga.e to ham-nashīñ

sahn-e-chaman kī yaad kyoñ tazkira-e-bahār kyā

shauq-o-talab kī raah meñ manzil-e-ashk-o-āh meñ

lā na sakī unheñ to phir gardish-e-rozgār kyā

qismat-e-ġham badal ga.ī dil ke nasīb jaag uThe

afsūñ ab un se kījiye shikva-e-intizār kyā

gulshan-e-lala-zar kya mausam-e-KHush-gawar kya

jis ki bahaar aap hain us ke liye bahaar kya

ruk to nahin gai kahin gardish-e-rozgar kya

tujh ko sukun se wasta ai dil-e-be-qarar kya

sina-e-dagh-dar dekh dida-e-ashk-bar dekh

dil ki mere bahaar dekh shoabada-e-bahaar kya

rah nai banae ja tez qadam uThae ja

shauq-e-talab baDhae ja fikr-e-maal-e-kar kya

KHauf hai phir na kuchh KHatar ishq agar hai rahbar

ho ke qarib-tar guzar fitna-e-rozgar kya

ahl-e-chaman hi jab hamein bhul gae to ham-nashin

sahn-e-chaman ki yaad kyon tazkira-e-bahaar kya

shauq-o-talab ki rah mein manzil-e-ashk-o-ah mein

la na saki unhen to phir gardish-e-rozgar kya

qismat-e-gham badal gai dil ke nasib jag uThe

afsun ab un se kijiye shikwa-e-intizar kya