gulshan hai isi ka nam agar hairan hun bayaban kya hoga

gulshan hai isī kā naam agar hairāñ huuñ bayābāñ kyā hogā

hañgām-e-bahārāñ jab ye hai anjām-e-bahārāñ kyā hogā

saaqī ke dayār-e-rahmat meñ hindū-o-musalmāñ kyā hogā

is bazm-e-pāk-nihādāñ meñ ālūda-e-īmāñ kyā hogā

ye jañg to laḌnā hī hogī har barg se chāhe ḳhuuñ Tapke

kāñToñ se jo gul Dar jā.egā dārā-e-gulsitāñ kyā hogā

ulfat ko miTāne ke dar pe duniyā aur maiñ is soch meñ huuñ

ulfat na rahegī jab baaqī ḳhvāb-e-dil-e-insāñ kyā hogā

maiñ duur bhī tum se jī lūñgā tum mere liye kuchh ġham na karo

maanā ki pareshāñ dil hogā aisā bhī pareshāñ kyā hogā

jis haath meñ hai shamshīr-o-tīr kyā us se umīd-e-barg-o-samar

jo shāḳh-e-nasheman toḌegā memār-e-gulistāñ kyā hogā

kis shai pe abhī ham jashn kareñ har-sū kāñTe kūḌā-karkaT

kuchh rañg-e-chaman aa.e to sahī ghūre pe charāġhāñ kyā hogā

jo tishna-laboñ ke haq ke liye saaqī se laḌe vo riñd kahāñ

jo dast-o-dahāñ kā ḳhūgar hai vo dast-o-garebāñ kyā hogā

saaqī kī ġhulāmī kar legā aur vo bhī kuchh qatroñ ke liye

nādān sahī mullā lekin itnā bhī vo nādāñ kyā hogā

āvāz-e-zamīr apnī sun kar 'mullā' ne banā lī rāh-e-amal

ye fikr kabhī us ko na huī andāz-e-harīfāñ kyā hogā

gulshan hai isi ka nam agar hairan hun bayaban kya hoga

hangam-e-bahaaran jab ye hai anjam-e-bahaaran kya hoga

saqi ke dayar-e-rahmat mein hindu-o-musalman kya hoga

is bazm-e-pak-nihadan mein aaluda-e-iman kya hoga

ye jang to laDna hi hogi har barg se chahe KHun Tapke

kanTon se jo gul Dar jaega dara-e-gulsitan kya hoga

ulfat ko miTane ke dar pe duniya aur main is soch mein hun

ulfat na rahegi jab baqi KHwab-e-dil-e-insan kya hoga

main dur bhi tum se ji lunga tum mere liye kuchh gham na karo

mana ki pareshan dil hoga aisa bhi pareshan kya hoga

jis hath mein hai shamshir-o-tir kya us se umid-e-barg-o-samar

jo shaKH-e-nasheman toDega memar-e-gulistan kya hoga

kis shai pe abhi hum jashn karen har-su kanTe kuDa-karkaT

kuchh rang-e-chaman aae to sahi ghure pe charaghan kya hoga

jo tishna-labon ke haq ke liye saqi se laDe wo rind kahan

jo dast-o-dahan ka KHugar hai wo dast-o-gareban kya hoga

saqi ki ghulami kar lega aur wo bhi kuchh qatron ke liye

nadan sahi mulla lekin itna bhi wo nadan kya hoga

aawaz-e-zamir apni sun kar 'mulla' ne bana li rah-e-amal

ye fikr kabhi us ko na hui andaz-e-harifan kya hoga