gulshan hai usi ka nam agar hairan hon bayaban kya hoga

gulshan hai usī kā naam agar hairāñ hoñ bayābāñ kyā hogā

hañgām-e-bahārāñ jab ye hai anjām-e-bahārāñ kyā hogā

ye jañg to laḌnā hī hogī har barg se chāhe ḳhuuñ Tapke

kāñToñ se jo gul Dar jā.egā dārā-e-gulsitāñ kyā hogā

ulfat ko miTāne ke dar pe duniyā aur maiñ is soch meñ huuñ

ulfat na rahegī jab baaqī ḳhvāb-e-dil-e-insāñ kyā hogā

maiñ dard bhī tum se jī lūñgā tum mere liye kuchh ġham na karo

maanā ki pareshāñ dil hogā aisā bhī pareshāñ kyā hogā

jis haath meñ hai shamshīr-o-tabar kyā us se umīd-e-barg-o-samar

jo shāḳh-e-nasheman toḌegā memār-e-gulistāñ kyā hogā

āvāz-e-zamīr apnī sun kar 'mullā' ne banā lī rāh-e-amal

ye fikr kabhī us ko na huī andāz-e-harīfāñ kyā hogā

gulshan hai usi ka nam agar hairan hon bayaban kya hoga

hangam-e-bahaaran jab ye hai anjam-e-bahaaran kya hoga

ye jang to laDna hi hogi har barg se chahe KHun Tapke

kanTon se jo gul Dar jaega dara-e-gulsitan kya hoga

ulfat ko miTane ke dar pe duniya aur main is soch mein hun

ulfat na rahegi jab baqi KHwab-e-dil-e-insan kya hoga

main dard bhi tum se ji lunga tum mere liye kuchh gham na karo

mana ki pareshan dil hoga aisa bhi pareshan kya hoga

jis hath mein hai shamshir-o-tabar kya us se umid-e-barg-o-samar

jo shaKH-e-nasheman toDega memar-e-gulistan kya hoga

aawaz-e-zamir apni sun kar 'mulla' ne bana li rah-e-amal

ye fikr kabhi us ko na hui andaz-e-harifan kya hoga