gulshan ko kuchh nasib tar-o-tazgi nahin

gulshan ko kuchh nasīb tar-o-tāzgī nahīñ

kaisī bahār aa.ī ki laa.ī ḳhushī nahīñ

gul sīna-chāk kaliyāñ abhī tak udaas haiñ

fasl-e-bahār meñ bhī ḳhizāñ kī kamī nahīñ

ġhārat-gar-e-chaman kahīñ ḳhud bāġhbāñ na ho

aisī to bebasī kabhī gulshan meñ thī nahīñ

kāñToñ ko chun ke pheñk na gulshan se bāġhbāñ

kāñTe nahīñ to baaġh kī phir ḳhair bhī nahīñ

phūloñ meñ laalī aa.ī hai mere hī ḳhuun se

lekin bahār ab mujhe pahchāntī nahīñ

kāñToñ ke saath phūloñ kā husn-e-sulūk dekh

pahlū-e-ġhair meñ bhī unheñ barhamī nahīñ

āñkhoñ se ham ne ashk ke dariyā bahā diye

lekin jigar kī aag bujhā.e bujhī nahīñ

ai dost ek tū hī nahīñ hai asīr-e-ġham

aisā hai kaun jis ko ġham-e-zindagī nahīñ

kāñTe rah-e-hayāt meñ har har qadam pe haiñ

phūloñ kī sej ai 'zakī' yeh zindagī nahīñ

gulshan ko kuchh nasib tar-o-tazgi nahin

kaisi bahaar aai ki lai KHushi nahin

gul sina-chaak kaliyan abhi tak udas hain

fasl-e-bahaar mein bhi KHizan ki kami nahin

ghaarat-gar-e-chaman kahin KHud baghban na ho

aisi to bebasi kabhi gulshan mein thi nahin

kanTon ko chun ke phenk na gulshan se baghban

kanTe nahin to bagh ki phir KHair bhi nahin

phulon mein lali aai hai mere hi KHun se

lekin bahaar ab mujhe pahchanti nahin

kanTon ke sath phulon ka husn-e-suluk dekh

pahlu-e-ghair mein bhi unhen barhami nahin

aankhon se hum ne ashk ke dariya baha diye

lekin jigar ki aag bujhae bujhi nahin

ai dost ek tu hi nahin hai asir-e-gham

aisa hai kaun jis ko gham-e-zindagi nahin

kanTe rah-e-hayat mein har har qadam pe hain

phulon ki sej ai 'zaki' yeh zindagi nahin