gulshan se aae hain na bayaban se aae hain

gulshan se aa.e haiñ na bayābāñ se aa.e haiñ

dīvāne tere sarhad-e-imkāñ se aa.e haiñ

ik māh-vash ke husn-e-farozāñ ke faiz se

dil meñ tajalliyāt ke tūfāñ se aa.e haiñ

āñkhoñ meñ hai bahār-e-do-ālam basī huī

ham log aaj mahfil-e-jānāñ se aa.e haiñ

kyā tere bas meñ un kā mudāvā bhī hai koī

dil meñ jo zaḳhm lutf-e-farāvāñ se aa.e haiñ

allah re ehtimām-e-bahārāñ ke silsile

sahrā meñ phuul sehn-e-gulistāñ se aa.e haiñ

un ke karam kī muft meñ tauhīn ho ga.ī

ilzām ham pe tangī-e-dāmāñ se aa.e haiñ

dil ko ġham-e-jahāñ kī shikāyat nahīñ rahī

ādāb-e-zīst sohbat-e-rindāñ se aa.e haiñ

kyā yaad aa ga.ī vo nigāh-e-jamīl-tar

phir dil meñ iztirāb ke paikāñ se aa.e haiñ

'parvez' āsmāñ ko na badnām kījiye

jitne sitam haiñ kū-e-nigārāñ se aa.e haiñ

gulshan se aae hain na bayaban se aae hain

diwane tere sarhad-e-imkan se aae hain

ek mah-wash ke husn-e-farozan ke faiz se

dil mein tajalliyat ke tufan se aae hain

aankhon mein hai bahaar-e-do-alam basi hui

hum log aaj mahfil-e-jaanan se aae hain

kya tere bas mein un ka mudawa bhi hai koi

dil mein jo zaKHm lutf-e-farawan se aae hain

allah re ehtimam-e-bahaaran ke silsile

sahra mein phul sehn-e-gulistan se aae hain

un ke karam ki muft mein tauhin ho gai

ilzam hum pe tangi-e-daman se aae hain

dil ko gham-e-jahan ki shikayat nahin rahi

aadab-e-zist sohbat-e-rindan se aae hain

kya yaad aa gai wo nigah-e-jamil-tar

phir dil mein iztirab ke paikan se aae hain

'parwez' aasman ko na badnam kijiye

jitne sitam hain ku-e-nigaran se aae hain