gulzar ke jalne ka nishan kuchh bhi nahin hai

gulzār ke jalne kā nishāñ kuchh bhī nahīñ hai

sho.ale na sharar aur na dhuāñ kuchh bhī nahīñ hai

hone pe bhī sab kuchh ye jahāñ kuchh bhī nahīñ hai

sab kuchh hai yahāñ phir bhī yahāñ kuchh bhī nahīñ hai

māyūs na hoñ ye bhī hai tamhīd-e-bahārāñ

ai ahl-e-chaman jaur-e-ḳhizāñ kuchh bhī nahīñ hai

sarmāya-e-hastī kā huā kartā hai saudā

saude meñ magar sūd-o-ziyāñ kuchh bhī nahīñ hai

jo kuchh bhī nazar aatā hai dhoka hai nazar kā

pesh-e-nigah-e-dīda-varāñ kuchh bhī nahīñ hai

har shai vo tujhe jis pe haqīqat kā hai dhoka

juz sho.abada-e-vahm-o-gumāñ kuchh bhī nahīñ hai

qatra bhī hai be-būd samundar bhī hai be-būd

ye kāh-e-subuk koh-e-girāñ kuchh bhī nahīñ hai

mai reḳhta TuuTā huā ḳhum jaam shikasta

maiḳhāne meñ ai bāda-kashāñ kuchh bhī nahīñ hai

gul zīnat-e-kāshāna-e-gulchīñ huā bulbul

hissa tirā juz āh-o-fuġhāñ kuchh bhī nahīñ hai

jo kor haiñ vo dekh nahīñ sakte haiñ varna

taqdīr ke parde meñ nihāñ kuchh bhī nahīñ hai

kyā pūchh rahe ho ki ḳhushī kyā hai alam kyā

phir tujh se maiñ kahtā huuñ ki haañ kuchh bhī nahīñ hai

zālim kī zabāñ aur kaf-e-jallād hai sab kuchh

ye teġh ye ḳhanjar ye sināñ kuchh bhī nahīñ hai

maqsūd jo apnā hai 'valī' sāmne us ke

duniyā ho vo yā bāġh-e-jināñ kuchh bhī nahīñ hai

gulzar ke jalne ka nishan kuchh bhi nahin hai

shoale na sharar aur na dhuan kuchh bhi nahin hai

hone pe bhi sab kuchh ye jahan kuchh bhi nahin hai

sab kuchh hai yahan phir bhi yahan kuchh bhi nahin hai

mayus na hon ye bhi hai tamhid-e-bahaaran

ai ahl-e-chaman jaur-e-KHizan kuchh bhi nahin hai

sarmaya-e-hasti ka hua karta hai sauda

saude mein magar sud-o-ziyan kuchh bhi nahin hai

jo kuchh bhi nazar aata hai dhoka hai nazar ka

pesh-e-nigah-e-dida-waran kuchh bhi nahin hai

har shai wo tujhe jis pe haqiqat ka hai dhoka

juz shoabada-e-wahm-o-guman kuchh bhi nahin hai

qatra bhi hai be-bud samundar bhi hai be-bud

ye kah-e-subuk koh-e-giran kuchh bhi nahin hai

mai reKHta TuTa hua KHum jam shikasta

maiKHane mein ai baada-kashan kuchh bhi nahin hai

gul zinat-e-kashana-e-gulchin hua bulbul

hissa tera juz aah-o-fughan kuchh bhi nahin hai

jo kor hain wo dekh nahin sakte hain warna

taqdir ke parde mein nihan kuchh bhi nahin hai

kya puchh rahe ho ki KHushi kya hai alam kya

phir tujh se main kahta hun ki han kuchh bhi nahin hai

zalim ki zaban aur kaf-e-jallad hai sab kuchh

ye tegh ye KHanjar ye sinan kuchh bhi nahin hai

maqsud jo apna hai 'wali' samne us ke

duniya ho wo ya bagh-e-jinan kuchh bhi nahin hai