gum-ba-KHud begana-e-har-aish-e-mahfil ho gae

gum-ba-ḳhud begāna-e-har-aish-e-mahfil ho ga.e

un se mil kar aur bhī tanhā ham ai dil ho ga.e

kitnī nā-manzūr qadreñ thiiñ jo apnānī paḌīñ

kitne hī pyāre aqā.ed the jo bātil ho ga.e

ilm jab kuchh bhī na thā to is qadar jāhil na the

ilm kuchh hāsil huā to aur jāhil ho ga.e

zindagī kā lutf tūfāñ meñ hai tuġhyānī meñ hai

haif jo āsūda-e-āġhosh-e-sāhil ho ga.e

ye hai mai-ḳhāna adab lāzim hai ye masjid nahīñ

dair se aa.e saf-e-avval meñ shāmil ho ga.e

kaash ye samjheñ sitam-keshān-e-newyork ai 'nazīr'

koī hai jis ke liye ham un se ġhāfil ho ga.e

gum-ba-KHud begana-e-har-aish-e-mahfil ho gae

un se mil kar aur bhi tanha hum ai dil ho gae

kitni na-manzur qadren thin jo apnani paDin

kitne hi pyare aqaed the jo baatil ho gae

ilm jab kuchh bhi na tha to is qadar jahil na the

ilm kuchh hasil hua to aur jahil ho gae

zindagi ka lutf tufan mein hai tughyani mein hai

haif jo aasuda-e-aghosh-e-sahil ho gae

ye hai mai-KHana adab lazim hai ye masjid nahin

dair se aae saf-e-awwal mein shamil ho gae

kash ye samjhen sitam-keshan-e-newyork ai 'nazir'

koi hai jis ke liye hum un se ghafil ho gae