gum hai faza chaman ki nazaron ko kya hua

gum hai fazā chaman kī nazāroñ ko kyā huā

gul haiñ udaas udaas bahāroñ ko kyā huā

kyoñ un kī raushnī hai shab-e-ġham se duur duur

ai āsmān tere sitāroñ ko kyā huā

dekhe to koī un kā taġhāful ki bād-e-marg

vo pūchhte haiñ dard ke māroñ ko kyā huā

qārūn-e-vaqt hai mirī hālat pe ta.ana-zan

parvardigār tere sahāroñ ko kyā huā

bār-e-garāñ hue haiñ takallum ke phuul bhī

rāhoñ meñ chalte-phirte mazāroñ ko kyā huā

mahfūz ahl-e-zulm kā qasr-e-hayāt hai

ai dil kī aah tere sharāroñ ko kyā huā

vo to havā-e-vaqt ke jhoñke the ai 'ḳhalīq'

kyoñ aaj sochte ho ki yāroñ ko kyā huā

gum hai faza chaman ki nazaron ko kya hua

gul hain udas udas bahaaron ko kya hua

kyon un ki raushni hai shab-e-gham se dur dur

ai aasman tere sitaron ko kya hua

dekhe to koi un ka taghaful ki baad-e-marg

wo puchhte hain dard ke maron ko kya hua

qarun-e-waqt hai meri haalat pe tana-zan

parwardigar tere sahaaron ko kya hua

bar-e-garan hue hain takallum ke phul bhi

rahon mein chalte-phirte mazaron ko kya hua

mahfuz ahl-e-zulm ka qasr-e-hayat hai

ai dil ki aah tere shararon ko kya hua

wo to hawa-e-waqt ke jhonke the ai 'KHaliq'

kyon aaj sochte ho ki yaron ko kya hua