gum ho na jae raunaq-e-bazar kya karen

gum ho na jaa.e raunaq-e-bāzār kyā kareñ

mahñgā.ī is qadar hai ḳharīdār kyā kareñ

bachchoñ se apne uns kā isrār kyā kareñ

ham ḳhud haiñ apnī zaat se bezār kyā kareñ

izzat kā paas koī bhī kartā nahīñ hai ab

shahr-e-anā meñ sāhab-e-dastār kyā kareñ

pathrā ga.ī hoñ raat kī āñkheñ hī jab to phir

zulmat-kadoñ meñ dīda-e-bedār kyā kareñ

kāñdhoñ pe sab ke rakkhī huī hai salīb-e-shab

ai sub.h-e-zindagī tire ġham-ḳhvār kyā kareñ

aatī nahīñ hai dil ke dhaḌakne kī bhī sadā

is ḳhāmushī meñ sāhab-e-guftār kyā kareñ

ahl-e-zabāñ ke muñh se zabāñ khīñch lī ga.ī

ab be-zabān jur.at-e-iz.hār kyā kareñ

dast-e-sitam ne kaaT lī bīnā.iyoñ kī fasl

ahl-e-nazar shu.ūr kā parchār kyā kareñ

bahre haiñ kaan zauq-e-samā.at ke bāvajūd

dhartī pe aaj adl ke autār kyā kareñ

har samt iztirāb hai bhauñchāl kī tarah

aisī fazā meñ sābit-o-sayyār kyā kareñ

ab zahr-e-habs sehn-e-chaman kī hai zindagī

'sāġhar' amīn-e-nik.hat-e-gulzār kyā kareñ

gum ho na jae raunaq-e-bazar kya karen

mahngai is qadar hai KHaridar kya karen

bachchon se apne uns ka israr kya karen

hum KHud hain apni zat se bezar kya karen

izzat ka pas koi bhi karta nahin hai ab

shahr-e-ana mein sahab-e-dastar kya karen

pathra gai hon raat ki aankhen hi jab to phir

zulmat-kadon mein dida-e-bedar kya karen

kandhon pe sab ke rakkhi hui hai salib-e-shab

ai subh-e-zindagi tere gham-KHwar kya karen

aati nahin hai dil ke dhaDakne ki bhi sada

is KHamushi mein sahab-e-guftar kya karen

ahl-e-zaban ke munh se zaban khinch li gai

ab be-zaban jurat-e-izhaar kya karen

dast-e-sitam ne kaT li binaiyon ki fasl

ahl-e-nazar shuur ka parchaar kya karen

bahre hain kan zauq-e-samaat ke bawajud

dharti pe aaj adl ke autar kya karen

har samt iztirab hai bhaunchaal ki tarah

aisi faza mein sabit-o-sayyar kya karen

ab zahr-e-habs sehn-e-chaman ki hai zindagi

'saghar' amin-e-nikhat-e-gulzar kya karen