gum-shuda logon ko kaise ganw mein laega tu

gum-shuda logoñ ko kaise gaañv meñ lā.egā tū

izhdihām-e-shahr meñ to ḳhud hī kho jā.egā tū

pattharoñ ke shahr meñ jo aadmī patthar kā hai

un ko kaise kāñch kī poshāk pahnā.egā tū

gard-e-ayyārī kī tah ko saaf maiñ kar duuñ agar

apnā chehra dekh kar darpan meñ Dar jā.egā tū

tū simaT jā.egā bargad kī tarah mumkin nahīñ

sūkhe pattoñ kī tarah ik din bikhar jā.egā tū

sach kahegā tū adālat meñ agar ai 'qādrī'

apnā sar bhī apne shānoñ par nahīñ pā.egā tū

gum-shuda logon ko kaise ganw mein laega tu

izhdiham-e-shahr mein to KHud hi kho jaega tu

pattharon ke shahr mein jo aadmi patthar ka hai

un ko kaise kanch ki poshak pahnaega tu

gard-e-ayyari ki tah ko saf main kar dun agar

apna chehra dekh kar darpan mein Dar jaega tu

tu simaT jaega bargad ki tarah mumkin nahin

sukhe patton ki tarah ek din bikhar jaega tu

sach kahega tu adalat mein agar ai 'qadri'

apna sar bhi apne shanon par nahin paega tu