guman-andar-guman ki kaifiyat hai

gumāñ-andar-gumāñ kī kaifiyat hai

zamīñ par āsmāñ kī kaifiyat hai

badan par barf ko mahsūs karnā

koī āb-e-ravāñ kī kaifiyat hai

ye kaisā tajraba hai sochtā huuñ

makāñ meñ lā-makāñ kī kaifiyat hai

koī āvāz ubhrī hai badan meñ

sukūt-e-jāvedāñ kī kaifiyat hai

nahīñ huuñ maiñ nahīñ huuñ boltā huuñ

nahīñ meñ yā'nī haañ kī kaifiyat hai

tire lab jhiil par ubhre hue haiñ

'ajab zaḳhm-e-nihāñ kī kaifiyat hai

'tarīr' ik baar jiinā chāhtā huuñ

jo sab ā.indagāñ kī kaifiyat hai

guman-andar-guman ki kaifiyat hai

zamin par aasman ki kaifiyat hai

badan par barf ko mahsus karna

koi aab-e-rawan ki kaifiyat hai

ye kaisa tajraba hai sochta hun

makan mein la-makan ki kaifiyat hai

koi aawaz ubhri hai badan mein

sukut-e-jawedan ki kaifiyat hai

nahin hun main nahin hun bolta hun

nahin mein ya'ni han ki kaifiyat hai

tere lab jhil par ubhre hue hain

'ajab zaKHm-e-nihan ki kaifiyat hai

'tarir' ek bar jina chahta hun

jo sab aaindagan ki kaifiyat hai